2008/09/17

Ginhawa

Papel sa dagang, napak-an,
Daw eroplano sa batang gapurol
Mituyok-tuyok sa lunhawng palibot
Sa malinawong kinabuhi sa banika.

Ning lawod sa kagabhion mihayag
Ang hunahuna luwan sa sakayan
Sa alampat namingwit og balak
Aron un-onon, sigop-sigopon.

Sa bukid ni Lolo, ubos sa balay
Agi sa kamalig, ilalom sa kalubihan,
Ang tabay misumpay sa sapa-sapa
Subay sa daplin sa uga nga basakan.

Kabaw nga gibakero mikalit og dagan
Milayat sa pilapil, migahi ang pangilong,
Ang simod mitulo, migukod sa babaye
Kabaw. Intawon, ang bata nahulog.

Ang tanang perlas sa kalibotan dili
Mapunpon kay dili tanang handomanan
Makuptan. Ginhawa lang, ginhawa...mas
Tinuod pa ang ginhawa kay sa hunahuna.

Akoy
2008.09.16
There was an error in this gadget

SUMUSUNOD

Bisita

Bisita