2008/09/27

Pandongi

Ipatong imong palad
Sa akong ulo
Taboni'ng alimpulos
Pandongi og lalom nga
Katulogon, tidlom sa kahilom.

Akoy
2008.9.27

Luag Na

Tagning ang katawa
Sa tawhay nga lawas
Gikan nahuwasan sa
Ambot unsa'y nakaon.

Di na labad ang ulo
Di na sakit ang mata
Luag nang tangkugo
Luag nang ginhawa.

Akoy
2008.9.27

Ang Tanan Sumpay

Ang adlaw ug gabii sumpay
Kalipay ug kasakit sumpay
Katawa ug luha, ikaw ug ako...

Akoy
2008.9.27

2008/09/25

Ginaksanay

mihalog ang itlog
sa linagang talong,
ug migakos ang talong
sa binatil nga itlog
kay init nang mantika
sa kalaha.

Akoy
2008.9.24

Paghinumdom

Mahimut-anon ka
Imong kaisog di katarog kanako
Imong kahimuot hinoon mitanod
Sa akong buot ug pagtahod.
Kining atong panagsuoray,
Ang kahimuot sa usag-usa,
Mibugkos sa atong panagsuod,
Buhing pagbati sa panagtagbo
Ug panag-uban,tinuod way kulang.
Maoy kahinam sa pagduaw,
Sa pagbalik...sa pagsalo-salo
Sa pag-estoryahanay
Hangtod sa imong pagpanaw
Lagsik ra gihapon ko sa kahinam
Nga magkita ta gihapon.
Kay nganong dili ko katuo
Nga ikaw nawala na.
Buhi ka sa panundoman. Ikaw,
Gasandig sa haligi sa pantawan,
Gahupot sa gitara,gapaabot
Gapraktis sa atong kanta.
Gakuskos sa kahimuot
Sa sunod natong panag-abot.
Natay-og ang akong kalibotan
Sa kagabhion nga mituhop
Sa akong kahiladman ang
Kamaturan nga nakawang
Kay nganong ikaw gilabni sa kahitas-an
Gikan sa akong kiliran.
Gitay-og ko ang trono sa langit
Kay nganong ako gihikawan
Sa nag-inusarang
Kalipay ning kalibotan.

Akoy
2008.9.25

2008/09/24

Daguok

Midaguok
Ang tingog sa baka
Sulod sa akong tiyan.

Akoy
2008.9.24

Pulong

papel
lang ba ang pulong
paliron
lang sa hangin?

Kuhit Sa Awit

Nataligam-an karon
Ang mananoy nga awit
Bisan tuod ganiha ra ni gatugtog

Daw gipukaw ang kahimatngonan
Sa kanindot nga makalipay
Sa panagtagbo sa awit ug pagpamati.

Daw gipasaka sa hagdan
Giabi-abi sa pantawan
Gipadayon, gipasulod sa lawak, unya...

Gibutyagan sa katagbawan
Sa iyang tinipigan
Nga katahoman

Akoy
2008.9.24

Mibagting Ang Batingaw

Gianinaw
Ang kapunawpunawan

Diin ang dagway sa Inahan?

Ang kahilom
Sa dughan may kahalang

Way laing nabatian, way nakit-an

Mibagting...



Akoy
2008.9.24

Ang Musika

Abyan sa sayaw-sayaw

Akoy
2008.9.23

Nasayod Ba Ka?

Nasayod ba ka
Nga gipangita tika?
Nasayod ba ka
Nga nakit-an tika?
Sa inyong paglabay
Sa imong hulagway
Apan usahay...
Sa imong pag-ayo
Sa akong kwelyo kaniadto
Imong mga kamot
Imong kahilom
Imong buhok
Imong kaanyag...
Imong...makalukmay...
Imong mga mata...ngabil...
Katahom, labi na ang imong kahiladman,
Nabati ko lang, nailhan ko lang.
...niining handoman makit-an tika.
Nasayod ba ka?

Akoy
2008.9.24

Udtong Tutok

Luwan ning barko
Gasandig, midungaw
Sa dagat mitan-aw
Gabawog-bawog
Ang mga balod,
Lalom nga kabughaw,
Plata sa kasilaw
Ang kahayag nga mitin-aw
Sa akong panimuot
Nakakita na sa kanindot
Sa dagat, sa mga balod
Nawagtang ang
Kaguol sa dughan
Ang alimuot sa utok
Nahanaw daw bula
Natunaw sa kahayag
Sa pagtutok.

Akoy
2008.9.24

Kahilom

Dili pulong kining kahilom
Makadungog, dili kaingon
Kahayag lang, daw hangin
Bisan asa paingon
Ang kisaw, tin-aw
Sa linaw gapahimuyong
Makakita, dili isda
Mopahiyom, dili kay gigutom
Adunahan siya sa katahom.

Akoy
2008.9.24

Hinalay

Pula
Gibandera
Sa bintana
Gihalay

Akoy
2008.9.24

Bisita

Wala dire
Wala didto

Akoy
2008.9.23

2008/09/23

Hanggab Sa Kahumot

Kahumot!
Pag-ablis pultahan.
Adobo? (Iya)
Kutoy (Akoa)

Akoy
2008.9.23

2008/09/22

Dagway

Dili pulong
Ang motagbaw kanako.

Akoy
2008.9.22

Adunahan

Kaadunahan ko sa
panahon karon:
inom og tsa
ug sa gutlo pagpunit sa baso,
gidampi sa ngabil
gidimdim ang pait-pait,
ang palami-lami
sa higayon
sa matag karon.


Akoy
2008.9.22

Hapyod Sa Galamhan

Karon nahimatngon--
nadalahig
nakapaminaw
sa katahom sa awit
Bisan, tuod taod-taod na ning
Gatugtog sa palibot.

Akoy
2008.9.22

Ang Kinabuhi

Musika--

Unsa ang Plawta

Kon way ginhawa?


Akoy
2008.9.22

2008/09/17

Ginhawa

Papel sa dagang, napak-an,
Daw eroplano sa batang gapurol
Mituyok-tuyok sa lunhawng palibot
Sa malinawong kinabuhi sa banika.

Ning lawod sa kagabhion mihayag
Ang hunahuna luwan sa sakayan
Sa alampat namingwit og balak
Aron un-onon, sigop-sigopon.

Sa bukid ni Lolo, ubos sa balay
Agi sa kamalig, ilalom sa kalubihan,
Ang tabay misumpay sa sapa-sapa
Subay sa daplin sa uga nga basakan.

Kabaw nga gibakero mikalit og dagan
Milayat sa pilapil, migahi ang pangilong,
Ang simod mitulo, migukod sa babaye
Kabaw. Intawon, ang bata nahulog.

Ang tanang perlas sa kalibotan dili
Mapunpon kay dili tanang handomanan
Makuptan. Ginhawa lang, ginhawa...mas
Tinuod pa ang ginhawa kay sa hunahuna.

Akoy
2008.09.16

2008/09/16

DISYEMBRE 2006: Garay-Binayloay Sa Kamingaw, Trangkaso,Gakos ug Panghiyuta, Sabaw sa Pasko

Alegre kaayo ang palibot

Mga sugang dagitab nga walay puangod

Bisag-asang suok nagkatawa

Daw gabiay-biay nga nakahibalo

Sa kamingaw nga naka-uga

Ning nagsalimu-ang kong galamhan

Mga pundok nga nagsinuk-liay sa ilang hudyaka

Mga kalingawan nga nagahatag talagsaong pahiyom ug palakpak

Pagkaon ug ilimnon nga walay paghubas

Mga babaye nga pagka-himsog kaayong sod-ungon

Apan bisan gani ang himaya sa balay-alampuanan

Dili makawagtang sa kamingaw

Nga pagkalawom ang dili masabtang dulot

Ngadto sa kina-uyokan sa akong kabukogan.

Pedro 12.1.06
----




Ang Trangkaso
(bow)

Ang trangkaso
pagkapait kung maimo
sip-on, ubo
ug sakit sa ulo

Ang panan-aw halap-halap
ang tutunlan karat-karat
ang pamati murag gilamat
diay kay taas ang hilanat

sa mananambal di muadto
kay matulog lang sa kwarto
apan unsaon pagkaayo
kung ang ulo mura'g gakalayo

pagmata, naghuna-huna
unsa na ma'ng orasa
prutas ug bitamina
murag wala ma'y obra.

pastilan ning trangkaso
makalibog gyud sa ulo
pangandoy nga himsog ko
aron mabalik ang "normal" nga ako
(normal kaha)


Baleleng
11.28.06

----
Pahilot Day Baleleng


Ako bitaw gitabangan kog hilot sa mga gagmayng kamot sa
akong mga anak. Tuslok diri, pislit didto, hapuhap gamay, tungtongan
sa luyo, gakusgakos ginagmay, pakapin gagmayng halok.
Nag-iyahay silag angkon sa tiil, lawas, bukubuko, ulo, angtang,
kamot. Naglumba silag duotduot nya gipakapinan ug hangyo sa
Ginoo nga si nanay maayo.

Da! wagtang gud akong hilanat, bun-og sad ang lawas, hehehe!

Yani

---
Day Yani,

balak ang pagbasa nako niini.
usa ka talagsaon nga balak.

kon galing ingon ani ang atong
pagtagad sa atong Yutang Tabunon

ang hilot sa gugma ug paglaom sa iyang mga puya
maoy makapaayo gayod sa Inahang Nasod.

nindot nga sambingay, nindot nga balak sa gugma,
nindot nga pagkagaray, maayong pagkahilot.

daw gihilot sad akong kasingkasing, daw nakumot
akong dughan, kay diryot nang motulo ang akong luha.


:)Akoy
2006.12.2

---
Bay Akoy,

Salamat!

Igo lang ko nga nisuwat sa akong kalipay
nga gibati nga ang akong upat ka anghel nga gagmay
pag mga kamot nipabati sa ilang labihan nga gugmang
ginagmay sab pinaagi sa ilang paghilot ug pag-ampo.

Bulahan gyod ko Bay sa akong mga anak sama nga bulahan
ang atong yutang natawhan kon kita may gugma Kaniya.

Yani

------



Hugot Nga Gakos*

mohiusa ko sa kanhiay
nga pagbati sa pakig-uban
nga gilaksi sa hangin,
sa dagat gianod
ug gidagit sa bangis
nga panahon.


hugot nga gakos
ania na ako, nahiuli
uban kaninyo.

Akoy
2006.12.14

(Alang sa Paghiuli ni Day Jake)

------

Bonbon


Bag-ong kinaras nga dahuran lamang ang ilang naabtan

Wa maagwanta ang kusog nga unos sa pagbati

Daw hanlulukay ang duruha ka managhigugmaay nagbalikos

Pulbos nga nangalimyon nanapot sa bukobuko ug panakyuran

Bonbon diay sa yutanayng tabunon


Pedro

------


Kining kayat sa yuta mahimo ba sab ning tawgon og pakighiyuta?

Tito

------


Guwapo kaayo ang nadagmay nimo nga pulong.

Pakighiyuta!
Oh, Pakighiyuta. Balaknon sad baya, dah.

Milubog si Alog sa yuta ug ang yuta midawat sa iyang lawas ingong hinalangpon nga hinigugma. Mitulo iyang singot ug nanurok ang binhi sa balili nga bunga sa iyang pakighiyuta sa dapit.

Maayo, Bay. Guwapo kaayo.

Tomas


--

Milabong ang balili ug nabulahan ang nagpasilong
sa iyang gahom...

didto siya gapungko ug gasandig sa kahingawa,samtang gahangad sa langit ug naniid sa bulok sa
hamis nga aping sa panganod nga nalukmay sa tutok sa mainitong kahidlaw...

Akoy
---



Labad Human Hudyaka


OooohhhuuuwwaaaaAAA!!!!OooohhhuuuwwaaaaAAA!!!!
Di na gyud ko mousabbbb!!!!

Daan pa lagi ko! Giingnan nag tama na! Hala gyus
la-la! Merisi!!!

Pagsabaw og manok bisaya nga kinamunggayan Day. Palihug.
PleaseeeoooohhhuuuwwwaaaAAAA!!!!!


Kibawo bya ka nga way manok bisayag kamunggay diri.
Tagaan ta na kas tanan nimong gipangayo, init tubig, bugnaw tubig,
kape, tsa, ice cream, juice, di man gyud na ma wa.
Da lagi katilaw ka na sab og labad!!!!


Di na gyud ko mousab Nanayyyyy...
Murtalsin pa di nagyuddddoooooaaaAAAAAAAAhhhhh!!!!!

Pag tingog sa telepono si kumpare nangagda na sab.....
Og si Inday andam nas bunal......


Pedro


------------

Kamatuoran!

O,kahidlaw gikan pa kaniadto
Karon lang natin-aw
Daw tubig sa sapa
Pagsalom, ang kauhaw natagbaw.

Lab-as nga tubig, O kaputli!
Ang sapa way gitago.
Dayag ang bato sa ilalom
Lakip kalag ko, nabutyag.

Ang handom sa kahiladman
Mitumaw sa kahimatngonan
Sa damgo nahigmata, napukaw
Ang hagbay nga kahidlaw nahanaw.

Mahikalimtan ba?
Apan buhi ang handomanan
Sa kalag ko ug alimpatakan, diin
Ikaw ug Ako lambigit daw uhaw ug tubig.

Ikaw ug ako nahiusa sa handomanan
Diin imong katahom, akong handom
Imong pagkamao, akong nahimatud-an
Ikaw masabtan, Ako may salabotan.

Nabatyagan,nasabtan
Nahukman: "Ikaw tinuod!"
Sapa nga putli, dagayday sa Paraiso.
Ikaw tinuod, Akong mithi.

Akoy
2005.7.24

Maayong Pasko sa Tanan

Mabuhi ang Bisaya!!!

Ang Pulong nagpakatawo.

Bulahan ang tibuok kalibutan tungod sa Pulong.



Ang Pulong nga gipakatawo may gahum.



Ang pulong puluy-anan sa naglatagaw o nasalaag.

Ang pulong kagawasan ug kaluwasan sa kalag.

Ang pulong kahayag sa kangitngit.

Ang pulong himaya sa kinaiyahan, kadaugan sa kinabuhi.



Ang pulong pako sa hunahuna ug salag sa pangisip.

Kalinaw ug Kalambuan!!!



Ang pulong binisaya...

Kagawasan ug Kamamugnaon alang sa Bisaya!

Mabuhi ang Bisaya!

Matawo ang Bisaya!

Mabuhi ang Gugma sa pulong!!!


Kay ang Pulong nagpakatawo tungod sa Gugma.

Ang Pulong, Gugma.

Ang gugma, pulong nga nagpakatawo.



Gugma alang kanimo Inday ug Ondo ning Panahon sa Pasko,

Akoy
2002.12.22.

Ginhawa

Papel sa dagang, napak-an,
Daw eroplano sa batang gapurol
Mituyok-tuyok sa lunhawng palibot
Sa malinawong kinabuhi sa banika.

Ning lawod sa kagabhion mihayag
Ang hunahuna luwan sa sakayan
Sa alampat namingwit og balak
Aron un-onon, sigop-sigopon.

Sa bukid ni Lolo, ubos sa balay
Agi sa kamalig, ilalom sa kalubihan,
Ang tabay misumpay sa sapa-sapa
Subay sa daplin sa uga nga basakan.

Kabaw nga gibakero mikalit og dagan
Milayat sa pilapil, migahi ang pangilong,
Ang simod mitulo, migukod sa babaye
Kabaw. Intawon, ang bata nahulog.

Ang tanang perlas sa kalibotan dili
Mapunpon kay dili tanang handomanan
Makuptan. Ginhawa lang, ginhawa...mas
Tinuod pa ang ginhawa kay sa hunahuna.



Akoy
2008.09.16

2008/09/14

Unta

Mapunpon nako unta
Tanang handomanan pati
Na'ng mga luha, unta...

Akoy
2008.9.13

2008/09/13

Way Bisbis

Ay
Tawon
Ang mga
Kabulakan
Sa tabunong
Yuta diha
Naughan sa
Sementong
Dakbayan
Way...


Akoy
2008.9.13

2008/09/11

SUMUSUNOD

Bisita

Bisita