2003/05/24

giahak!

mikokak-kokak
niambak-ambak
natagak
naglagatak
nagpalakpalak.

sa pagtaak sa
nagbasak
niyatak sa kokak---
natuak.
ang nagtapak
nadakdak,
nabundak,
ang ulo napahak.

naglaklak
ug alak
baraha gisaksak
nagbalak-balak
kauban namakpak
uban sa buhakhak.

ang anak nga damak,
gahangak,
tiyan gahiyak
kay giwakwak
sa lubi'ng way hakhak.


kay mikakak
gisapak;
gihapak
kay namakak.
ang baso
nabuak
ang ngipon
nangataktak.

wa nay ipaak
sama sa kokak
nga nakadakdak
sa amahang
giahak!


Akoy
2003. 5.24

2003/05/17

Mugna sa Pulong

labad sa ulo
tuyok tuyok sa utok
palayo dire, palayo ngadto
sa dapit
sa kadagatan
ibabaw sa pangpang
ang balay sa akong damgo

didto magtan-aw sa dagat
sa pantawan gapungko
sa bangko nga ginama sa kahoy
kay kining balay ginama man sa kahoy
mugna sa damgo
buot ka bang mokuyog kanako?

sa buntag magkuyog kita sa pagpamahaw
ug sa pagsalop sa adlaw
kuyog kita sa pantawan
magtupad og lingkod sa paglantaw
magsud-ong sa kanindot ning langit
samtang gahigop sa mainit nga kape.

apan sa ubang mga takna
buot kung mag-inusara diha sa sala
o sa pantawan magbasa
buot kung masulod sa
ginadamgo nga kalipay
pangandoy nga sinulat
o minugna sa pulong.

buot ka bang mokuyog?


Akoy
2003.5.17

2003/03/09

DAMGO

Sa bata pa ko, kanunay...
ang damgo sa adlaw'ng tutok.
Natuman ang pipila,
apan wa lang damha
lahi ang hulagway sa kahimtang.

Naundang ang damgo
kaha, kay nanigulang,
ang kabatan-on gidaog sa bug-at nga kahimtang
pinas-an ang ngil-ad nga kamatuoran:
ang kagutom sa kadaghanan,
ang kauhaw sa uban,
ang kadaotan.
Nakabsan ang kusog sa damgo...
kay ang kinaiyahan ug katawhan
gikabsan sa kadaiyang kalambo'an.
Subo ang kasingkasing,
giluya sa kahuyang
gilamon sa kahaw-ang...
Ang tawo--- anak ning kalibotan,
bunga sa Damgo---gipasipad-an.

Uhaw sa damgo
ang nagkadaiyang katilingban sa kinaiyahan ug katawhan
Damgo sa kabataan nga mahimsog,
ang katawa ug hudyaka sa ilang dula.
Ang tigulang may pahiyom
may gipaambit nga sugilanon.
Suod ug lalom ang sandurot
sa mga batan-on ug hamtong.
Malipayon ang banay sa
timba-yayong.
Way gutom!
Way kahadlok!
May pagkaon bunga sa paglihok.
Usa ka damgo ang bunga
sa kahoy,
ang kakahoyan,
ang tim-os nga hangin,
ang huni sa tamsi,
tam-is nga awit,
damgo ang langit.
Tan-awa!
Tin-aw nga hulagway ang langit
ibabaw sa lanaw.
Pamati-a!
ang tam-is nga awit:
Ang Kalibutan mamahimong Langit.
Damgo!

Akoy
2003.03.09

2003/01/19

O, Mama Mia

Naglawig ko,
nag inusara
sa lawod gianod
sa hangin gitukmod.
Niabot ang kamingaw,
langob nga mitaklob,
kahilom makabungog,
ang kabugnaw...
dulot sa bukog!

O, Mama Mia
Imong tingog,
akong nadungog
sa dughan milanog,
migun-ob sa ngiob.
Dayag ang hulagway,
matahom nga pahiyom
sa kamingaw mihupay
nakigsayaw…
sa imong laylay!

O, Mama Mia
Ang imong tawag,
akong kagawasan;
handom sa kalimot,
kalipay sa nabanhaw,
naluwas nga kahidlaw.
Diay, ikaw dili isalikway,
inahan sa kanunay,
akong dungog...
Inahang Tingog!

Akoy
2003.01.19

SUMUSUNOD

Bisita

Bisita