Dag-om Sa Bintana

Tungab sa hurot na
Nga Orange juice
Moulan kaha ron?
Taligsik na.

Akoy
2010.4.18

Handoman sa Tabios

Tabyos! Tabyos!

Linagang tabyos

Kalami, kalami

Sa unang pagtilaw 

Sa init-init nga katam-is

Sa tabyos sa ubos

Sa tanaman sa kabanikahan

Gihukad sa talad-kan-anan.

Paniudto kadto sa bukid ni Lolo.

Akoy

2008.11.27

Luag Na

Tagning ang katawa
Sa tawhay nga lawas
Gikan nahuwasan sa
Ambot unsa'y nakaon.

Di na labad ang ulo
Di na sakit ang mata
Luag nang tangkugo
Luag nang ginhawa.

Akoy
2008.9.27

Ginaksanay

mihalog ang itlog
sa linagang talong,
ug migakos ang talong
sa binatil nga itlog
kay init nang mantika
sa kalaha.

Akoy
2008.9.24

Talinghaga Sa Humba

nangalimyon ang kahumot
pag-abli sa taklob

gihukad sa talad ang
talagsaong halad

mitungha ang anito
taliwala sa bangaw

mikalawat sa halad
misimhot sa palad

tungod sa humba
natagbaw ang takna

gibayaw sa panganod
ug di na kalimot


naningangha sa
talagsaong pagtungha

sa dili ikalimod nga
talinghaga sa simod


Akoy
2007.01.25

Day,

bawo lang

makabuyong
ang
lami
sa
humba
mohuot
sa
dughan
mohugot
sa
kaugatan

kalami
komoton
ang
humok
humot
lamonon
ang
simod
mosinaw

bawo lang

Akoy
2007.01.23

Bisaya nga Manok

I
Mga Biniyaan
Latagaw sa kadalanan
Usay kakha usay tuka
Sa bisang unsa, mokaon lang

Niwang ug idlas
Hapit maihalas
Kay bisan sa damgo
Gigukod og mangtas.

Bisan ang pugaran
Gikamang sa bitin
Gilamoy ang mongaan,
Mga piso nagkaguliyang.

Ang gilumloman nga itlog
Gidila-dilaan, ngil-ad ang dangatan
Kay bisan mapiso, tukbon man lang
ug kon makaipsot, dagiton sa agila.

II
May tingog sa kamingawan
Sa kaadlawon madunggan
Tugtogaok. ….ang adlaw misubang,
ang manok nga bisaya, sa Yuta mitugpa.

Mibirig-birig sa pinangga
Dalit ang binhi sa yuta
Tugob sa kahidlaw
Tingob nga hatag.

Ang pakigsalo sa gugma
Kinaham nga labing lamian
Undanon nga handomanan
Katagbawan sa kahiladman.

Adobo,pinirito kun gikalamonggayan
Tinibuok, sinugba, kun sinabwan
Kalami gyod balik-balikan
Ang talagsaon...ang Bisaya nga Manok.

Akoy
2005.10.19