Bihag

Pughawng mga mata
Mananap nga sukad
Karon lang nahimamat
Matahom ka man,
Apan sa pagpangayam
Wa koy ikaandam.
Kon mohata ka,
Ambot kon ako mobalos
Kon manawag ka,
Diha pa ko masayod
Kon mabihag ba
Ang ulipon na daan,
Ang bihag sa panahon.


Akoy
2008.11.12

Pag-uli

Mitalikod ako,mibiya kanimo
Aron matan-aw ka sa layo
Mahinagbo sa akong pag-uli
Aron imong katahoman, matagamtaman.

Akoy
2008.11.11

Sakayan Sa Kapit-os

Sakayan sa kapit-os ang kasingkasing

Hapdos sa mga lambos sa

Panagsangka sa kabalaka ug ginhawa

Sa ilalom nahulog ang panahon

Nalubog ang tanlag sa kahilom

Nalumos  ang pagbati, gapadailos 

Sa lapalapa, sa baroganan

Sa salog,  sa sakayan.

Miinom sa tubig, midungo, mitidlom

Ang sakayan sa kasubo ug pag-ampo

Kahuyang ug pangaliyupo midunggo.

Akoy

2008.10.28

Wala Ko

Ikaw ang tuboran sa akong kusog. (Wala ko)

Ikaw ang tuboran sa akong  kinabuhi. (Wala ko)

Akoy

2008.10.28

Kaban

Ako lang ang mobayad

Sige lang, kay gikan ni gihapon sa

Maong kaban

Akoy

2008.10.26

Ako

Ako
Ang imong tawo
Mando-i
Ako

Akoy
2008.10.23

Batan-on

Kagahapon sa panihapon
Mitumaw sa taliwa
Sa talad-kan-anan

Mipadayag sa kaanyag
Sa kadasig ug kabulahan
Ikaw, sa imong kabatan-on.

Akoy
2008.10.20

Ilhon Pag-ayo

Ilhon ko ikaw pag-ayo
Sama sa kaugalingong palad
Hapohapon...

Akoy
2008.10.9

Buyag...Simba ko!

bisan unsay gipangyawit
apan ang usa ka buang may balak nga tinipigan.

motuo kag sa dili,
may kasugiran ang iyang kapalaran...

iyang gibutyag sa udtong tutok ang kahimtang
diay, ang kasagaran...mga buang....

siya gayawyaw sa iyang kaugalingon
samtang ang kadaghanan…gihilom lang…

ang kabuang…
buyag, simba ko!

Akoy
2006.11.10

Dugay Na

dugay nang
wa ko kalupad
dugay na...

kaniadto,
molupad ko kon masulob-on
ngadto sa kawanangan, ibabaw sa kalasangan....
sa kabukiran...lunhawng tanaman...
ngadto palayo sa kahimtang...

motugpa didto sa sekretong batoganan
nga akong gitukod sa wanang…
tanan kong dulaan,
mga kalingawan...naa didto
ug mao sad akong sakyanan pagtuyok
sa tibuok kalibotan…
kuyog sa mga kahigalaan.

dugay nang
wa ko kalupad
dugay na...


Akoy
2006.11.04

Tinghulog og Dahon

may dahon sa tiilan
sa pagtunob sa hagdan

“tinghulog na pod...”
mabulokon nga panahon

apan dili manamilit
kon way maniid

molarag sa hilom
kon dili sud-ongon

ang dahon...
sa yuta paingon.


Akoy
2006.10.25