2011/12/23

Wala Na Dayon

'89 kon dili '90
 Sud sa lawak nimo
 Ang Macintosh,apan
 Daw wa ra man sa ako.

 Laing amigo ang miingon:
 "Ma-connect ang mga computer
 Sa lain-laing library, puhon."
Kadto nuon, nakahangad ko gamay.

 Akong gilingi, gitan-aw ug nakita
 Ang library, ang mga bintana niini
 Kanindot biya unta kon mahitabo na
Maoy nahunahuna,apan wala na dayon.

 Akoy
2011.12.23

2011/12/20

Ang Kinabuhi


Kon mabugto ang ginhawa
Matumba kining lawasa
Kay ang kinabuhi 
Wala na.

Ikaw
Ang Kinabuhi
Ang tinuod nga tubod
Ang sinugdanan sa tanan.

Akoy
2011.12.20


2011/12/18

Usa Ang Kagikan


Gabii sa dalan galakaw
Gatagbo ako ug ikaw
Lahi-lahi ta'g paingnan
Apan usa ang kagikan.

Akoy
2011.12.18

2011/12/15

Dr. Jose P. Rizal: Ang Numero Uno


Dire sa 5 D'Aguilar Street
Ang imong klinika sa mata
Gikan Disyembre 1891
Hangtod Hunyo 1892.

Karon, Disyembre 2011
120 ka tuig na ang milabay
Nag-abot ta dinhi, nangape
Sa Starbucks, Century Square.

Naay plake* ubos ning kapehan sa
1 D'Aguilar St krusing sa Queen's Rd
Duol sa World-Wide House nga
Taboan sa atong mga kababayan.

Matud nila, "Ikaw, ang numero uno
Nga OFW sa Hong Kong." Tinuod ba?
Nganong mopauli man gyod ka sa P.I.?
Aron ma-'for good' ka sa Luneta?

Akoy
2011.12.15


*Plaque:
DR. JOSE P. RIZAL
(1861-1896)
PHILIPPINE PHYSICIAN, POET,
AUTHOR, PATRIOT
PRACTICED MEDICINE IN 1891-1892
IN A CLINIC WHICH
ONCE STOOD ON THIS SITE.


2011/12/01

Giyam-iran

                                                            
Ang balak
Nahikalimtan
Gisusok sa bulsa
Wa na masulat
Giyam-iran
Sa dahon.

Akoy
2011.12.1

2011/11/16

Sinina



Gipangita
Gihandom
Sul-ubon unta
Gitugnaw ko ron.

Akoy
2011.11.16

2011/09/02

Mata

 Dili matugkad ang katin-aw
Sa imong mga mata
Lalom ang kahilom
Daw dili matidlom.

Akoy
2011.09.02



2011/08/21

Angkas Sa Gugma


Bisikleta ilang gisakyan
Gaangkas ang babaye sa luyo,
Gisandig niya iyang aping sa likod sa lalaki,
Nga iyang uyab? Nga maoy gamaneho sa bisikleta daplin sa dalan,
Kay katagbo nila ang mga sakyanan?

Hapit na tungang gabii.
Gikapoy kaha siya? O silang duha? Gikan kaha siya sa hago nga trabaho?
Maayong paghalog niya sa hawak, sa iyang uyab?
Hinaot dili siya makabuhi, kay delikado ang katulogon angkas sa bisikleta.
Apan, mora siyag natulog diha sa tumang pagsalig kaniya.

Nagkugi og sikad ang lalaki ug hilom nga milalin ang ilang bisikleta
Padulong sa pahulayan sa ilang gisakyan nga gugma.


Akoy
2011.8.21

2011/08/18

Hayahay

Gisingot ang panuhot
Migawas sa lawas
Tawhay ang gininhawa 
Hayahay ang hangin.

Akoy
2011.8.18

Singot Sa Alimuot

Gisingot pag-ayo, buntag sayo
Alimuot ang kwarto, pultahan nasirado
Wa milahos sa bintana ang hangin
Kay ang pultahan  gitrangkahan.

Akoy
2011.8.18

2011/08/17

Bunabuna Kun Bagulbagol



'Bagulbagol' diay ang 'skull'?
Abi kog 'bunabuna' ang upaw sa ibabaw
Kuan kuno, ang bunabuna ubos sa tiyan
Ibabaw gamay sa kuan nga bunal-bunalan.

Akoy
2011.8.17

2011/08/14

Alas 12:12



Sa kaadlawon gibati kog kaihion
Giutong...

Mibarog, miadto sa banyo
Gipasirit na lang dayon.

Alas 12:12 sa kaadlawon
Di pa pod ko katulgon.

Mobarog, mohigda sa kama
Matulog na lang dayon.


Akoy
2011.8.14

2011/08/13

Inom


Hangin sa gawas
Misulod sa bintana
Misunod ang kainit.
Miabot ang kaalimuot.

Hinoon bisan dili mag-aircon
Pwede moinom og bugnaw nga beer.
Pero, alas kwatro y media pa intawon karon.

Akoy
2011.8.13

2011/08/12

OK


Tunga sa gabii na
Tugnaw na
Tulog na.

Akoy
2011.8.12


2011/08/11

Kaabtik

Kay di man mapugngan ang panahon
Kaabtik na lamang ang atimanon.

Akoy
2011.8.11

2011/05/21

Zorse o Hebra

Si Zebra imong mama
Ug si Horse imong papa
Kinsa ka Zorse o Hebra?

Akoy
2011.5.21


2011/05/17

Talisay


Landong sa ubos sa imong punoan
ug bulawanon ang mga dahon
nga gihanig sa tiilan.

Akoy
2011.5.17



2011/05/15

Tuko

Kay naipit sa pultahan
Nahulog  sa salog ug giitsa sa tugkaran
Alang sa manok, pato, iring kun si kinsa nga bulahan
Itom nga iro ang misimhot apan gapanglingo-lingo
Ug gitalikdan ang patay nga tuko.

Akoy
2011.5.15

Ang Gamayng Piso



Sa akong palad
Nakabsan og ginhawa
Ang gamay'ng piso.

Akoy
2011.5.15

2011/04/15

Simponiya Sa Kaadlawon

Sa pagmata, nadungog
Ang tugtogaok sa manok
Awit sa kalanggaman
Kasikas diha sa kahilom
Daw simponiya sa kaadlawon.


Akoy
2011.4.15

2011/04/03

12:02

Udtong tutok sa kagabhion
Matulog na.
Gisamok sa mga lamok.

Akoy
2011.4.3

2011/04/02

Kabahong

Ang kabahong
Sa tiilan
Morag bulkan.

Akoy
2011.4.1

Hapit Sa Kahilom



Hapit sa kahilom.
Lantawon, tan-awon.
Binlan og pahiyom.

Akoy
2011.4.1

2011/03/08

Ang Dag-om



Nganong gadalogdog sa kaudtohon
Nga galagiting man unta ang kainit sa adlaw?
Sa gawas sa pultahan gisusi ang kalangitan
Ug tuod man, didto sa unahan, dapit sa amihanan
Galagom ang dakong dag-om.

2011/02/23

Nahurot Na


Pagtungab sa baso
Kahumot na lang sa kape
Ang nahanggab.


Akoy
2011.2.23

2011/02/15

Chess



Ang takna miabot
Hugasan nako
Ang chess board.

Akoy
2011.2.15

2011/02/13

Bitoon


Sa langit mihangad
Bitoon ang gitan-aw
Kay ang kahayag sa dagitab
Di na katagbaw
Sa mga panghupaw.

Akoy
2011.2.13

2011/02/05

Gamating Nga Iring


Mitungtong sa tiil  
Ang gamating nga iring
Misandig-sandig, mipakilid
Mipaduol lang gyod sa kainit.


Bugnaw ang semento
Wa siyay tsinelas
Wa na pod siyay inahan.
Nailo ba siya o biniyaan?

Mibutho siya sa kusina
Gisagop niya kining balaya
Gihimong unlan ang akong tiilan
Panahon sa ting-ulan.

Akoy
2011.2.5









Matulog Na Ko

Mihatsing
Paglabay sa bugnawng hangin
Daw nanimbawot ang balahibo.
Gitugnaw na kun gikapoy ba?
Matulog na ko.

Akoy
2011.2.5

2011/02/04

Kasinatian Sa Bata

"Migas...migas.."
Pwerte nimong hilak
Gipaak ka'g lamigas.



 "Halang...halang..."
Namula ang ngabil
Kay sili ang giingkit.

Akoy
2011.2.4

2011/01/31

Sa Iyang Pag-inusara

Lab-as nga hangin
Ang mihulbot sa panghupaw
Hapyod sa mga balod
Ang mitagbaw sa baybayon
Sa iyang pag-inusara.

Akoy
2011.1.31

2011/01/23

Kalibangon


Tinae migimok, lubot mikibot
Apan, di pa gusto sa trono molingkod.

Akoy
2011.1.23

2011/01/22

Mata

Nangita'g kahayag ang mata
Sama sa giuhaw og tubig
Kun gigutom og pagkaon.

Akoy
2011.1.22

Magpuyo

Ambot kon asa ko adto
Sa wala o sa tuo,
Sa unahan o sa luyo?

Magpuyo na lang ko.

Akoy
2011.1.22
There was an error in this gadget

SUMUSUNOD

Bisita

Bisita