Galiad

Nabinat 

akong galamhan 

Sa dayag nga kaanyag 

Sa lawas mong 

Galiad.

 Akoy 

2012.10.24

Ang Kagahapon

Ang Kagahapon 

Gimingaw sa kanhiay nga pinuy-anan 

Usa ka handurawan na lamang ang nakaplagan 

Kay tinuod man, ang kagahapon wala nay  ulianan.

Akoy

2012.10.14

Sa Iyang Pag-inusara

Lab-as nga hangin

Ang mihulbot sa panghupaw

Hapyod sa mga balod

Ang mitagbaw sa baybayon

Sa iyang pag-inusara.

Akoy

2011.1.31

Hain Ka Na?

Bisan sa panumdoman, hanap

Sa dughan na lang madumdoman

Gamay. Dili ang imong panagway

Ang nabatyagan, kahidlaw na lamang.

Akoy

2010.4.16

Handomanan Sa Usa Ka Bulak

Di matan-aw apan hikit-an, di mahikap apan mabatyagan
Dili siya priso sa hunahuna, lalang siya sa kawanangan, sa kalikopan.
Kalingawan iyang tumong sama sa kalipay ug kalinaw o kaha handomanan
Sa panagway sa katahoman nga aloman dapit sa iyang suwang. Maanyag siya,
Niadtong dalaga pa, niadtong nagka seatmate mi sa third year (HS)hahaha...Unya
Akong bolpen nahulog sa iyang saya, wa tuyoa, tunga-tunga sa iyang sabakan. Unsaon
Na lang nga dili man ko mangahas pagpunit kay duol sa na sa langit, misteryo ug milagro.
Ambot kon siya mipahiyom, kon siya mitan-aw sa kaulaw, kon unsang hitaboa nganong
Dili ko moduol kaniya? Ambot kon unsay nahitabo sa bolpen karon, kon diin na, kon wa
Na ba? Nahutdan ba'g tinta? Basta.
Wa damha giduolan kos iyang mga amiga, nga ako pod nga higala. Ang nanguna, mitug-an
Gani, mitug-an paglabay sa mga katuigan nga "Ikaw akong crush kaniadto."Samtang karon
Ako gipangutana, nganong iyang amiga nga akong katupad gipadunggan,"Never been kissed,
Never been touched, but totally damaged." Hanap. Morag mao morag dili,apan mabatyagan ang
Inalisngaw sa kapungot nga hinungdan ug naingnan, "Kay 'arte' kaayo siya".O, nasuya ko kaniya, sa
Iyang kaarte. Mao seguro ni. Kay daw tandogonon nga dili patandog. Kay tingali nabatyagan nako ang
Iyang kahilas nga basin kami magka-touch o kaha ang kahilas naa ra sulod sa akong 'stage of puberty'
Nga hunahuna. Mao seguro nga wala dinhi, wala didto nga kahilas, kaulaw kun kaarte nga maoy
Hinungdan nganong ang bolpen dili puniton. Na ambot na lang. Hilas is in the mind. Kay ang kaulaw
Hunahuna lamang. Ang kaarte? Ambot lagi.
Hangtod karon dili ko kauyon, kay daghang mapugngan, dili mabuhat tungod sa mga arte-arte lamang.
Tuod man, humanon nato ning asoy sa kasuya sa kaarte nga wala didto wala dinhi. Ug wala diay ni sa
Langit ug sa yuta, wala gani sa mga nanglabayng panahon, kay nabilanggo ra diay sulod sa hunahuna,
Ang bilanggoan nga wala dinhi wala didto nga dili tinuod, kay lagi hunahuna lamang ang iyang mga rehas.
Nagkasuod ra gihapon ming tanan. Kon unsa man kadto, nagkaestorya ra.Pahiyom na lang ang ako ron.

Akoy
2010.4.15

Kamingaw

Kanunay siyang moduaw.
Siya, ang suod kong higala.

Akoy
2010.4.15

Nahiubos

Ngutngot ang itlog

Napungot, nahiubos

Luag ang sanglog

Akoy

2010.2.9

Makatay-og

Imong katahom

Makabugto'g ginhawa
Ug makaluya.

Akoy

2010.2.8

Salop

Miduaw ang handurawan sa
Salop sa adlaw luyo sa kalubihan.
Gimingaw ko sa iyang mga bulok
Sa katagbawan sa iyang katahoman.

Akoy
2009.4.14

Sakayan Sa Kapit-os

Sakayan sa kapit-os ang kasingkasing

Hapdos sa mga lambos sa

Panagsangka sa kabalaka ug ginhawa

Sa ilalom nahulog ang panahon

Nalubog ang tanlag sa kahilom

Nalumos  ang pagbati, gapadailos 

Sa lapalapa, sa baroganan

Sa salog,  sa sakayan.

Miinom sa tubig, midungo, mitidlom

Ang sakayan sa kasubo ug pag-ampo

Kahuyang ug pangaliyupo midunggo.

Akoy

2008.10.28

Samad Sa Ilad

Nangisog ang liyon
Kay gitigbas
Mibarog
Kay hapdos ang samad sa ilad,
Nakigharong,
Hangtod milampos ang katarong.



Akoy
2008.10.16

Luag Na

Tagning ang katawa
Sa tawhay nga lawas
Gikan nahuwasan sa
Ambot unsa'y nakaon.

Di na labad ang ulo
Di na sakit ang mata
Luag nang tangkugo
Luag nang ginhawa.

Akoy
2008.9.27

Paghinumdom

Mahimut-anon ka
Imong kaisog di katarog kanako
Imong kahimuot hinoon mitanod
Sa akong buot ug pagtahod.
Kining atong panagsuoray,
Ang kahimuot sa usag-usa,
Mibugkos sa atong panagsuod,
Buhing pagbati sa panagtagbo
Ug panag-uban,tinuod way kulang.
Maoy kahinam sa pagduaw,
Sa pagbalik...sa pagsalo-salo
Sa pag-estoryahanay
Hangtod sa imong pagpanaw
Lagsik ra gihapon ko sa kahinam
Nga magkita ta gihapon.
Kay nganong dili ko katuo
Nga ikaw nawala na.
Buhi ka sa panundoman. Ikaw,
Gasandig sa haligi sa pantawan,
Gahupot sa gitara,gapaabot
Gapraktis sa atong kanta.
Gakuskos sa kahimuot
Sa sunod natong panag-abot.
Natay-og ang akong kalibotan
Sa kagabhion nga mituhop
Sa akong kahiladman ang
Kamaturan nga nakawang
Kay nganong ikaw gilabni sa kahitas-an
Gikan sa akong kiliran.
Gitay-og ko ang trono sa langit
Kay nganong ako gihikawan
Sa nag-inusarang
Kalipay ning kalibotan.

Akoy
2008.9.25

Hugot Nga Gakos

mohiusa ko sa kanhiay
nga pagbati sa pakig-uban
nga gilaksi sa hangin,
sa dagat gianod
ug gidagit sa bangis
nga panahon.


hugot nga gakos
ania na ako, nahiuli
uban kaninyo.

Akoy
2006.12.14
(Alang sa Paghiuli ni Day Jake)

Kahinangop

Gahaguros ang bulhot sa ilong...


Akoy
2006.12.4

Ang Kahaw-ang

Ning paghinuklog sa kahaponon, kon unsa ang kinabuhi,
gibati ang kahaw-ang, samtang galingkod lang…gatan-aw….
Sa akong pag-usob og tutok sa palibot, naamgohan nga ang huni
sa langgam ug bulok sa kadahonan sa kakahoyan misulod na sa
wanang sa akong kahaw-ang. Sa pag-abot sa takna sa pagbarog
ug pagpadayon og lakaw, siya usab mitungha sa akong
kahimatngonan nga galingkod daplin sa dalan ug namintal sa
yano apan bulawanong hulagway sa kakahoyan nga gatalay ug
namandong sa dalan sa ilang katahoman.

“Unsay pagbati sulod sa imong ginahulagway?
Kay karon, ako kahaw-ang, daw ako usa ka wanang.”
“Mao usab ako, kay unsay bili sa hunahuna…
kakapoy lang... ug dili pod tinuod ang kasagaran?
Ania lamang ako dinhi karon.”

Sa hilom…nabati ko ang iyang pagdungaw
sa akong kahaw-ang. Makasulod kaha siya sa
akong kahimatngonan,kon wa koy kahaw-ang?
Kay kon walay wanang, diin mobatog kining pagbati
ug hunahuna, diin motungha ang mga matahom nga linalang?
Kon walay wanang…walay katugpaan ang tanan.

Taliwala sa kakahoyan, ilalom sa ilang mga dahon ug bunga
ug sa kahilom nga gialirongan sa huni sa kalanggaman
ug siya nga galingkod daplin sa dalan nga karon akong gituparan,
napamatud-an ang kabililhon sa kahaw-ang. Ug pinaagi sa
mga pahiyom, katingala, pagbutyag ug padayag,
hinayhinayng nahulagway ang mga pangutana sa pag-ilaila,
mga pangandoy ug uban pang tinipigan sa kahiladman...

Wa damha...
nanguhit na ang kilomkilom, buot nang makig-uli.
Human sa panamilit, misubay na sa dalan nga giladlaran sa
bulawanong katahoman, bitbit ang gisaw-an nga handomanan.
May gapabilin bang kahaw-ang nga kapintalan ugma pohon
o kaha sa sunod tinghulog og dahon?


Akoy
2006.11.15

Anak sa Inahan

amping sa imong
kasingkasing...ayaw’g
hasola ang imong pagbati

undanga ang paghunahuna,
mohuot lang sa dughan ang
kapungot ug mga kabalaka

ang imong galamhan ang
unang madaot, biyai ang nagbuot
nga hunahuna sa kagahapon ug ugma

adto karon sa imong tanaman sa kalibotan
sulod sa ganghaan sa kahimatngonan diha sa
imong kalawasan, tungatunga sa kasingkasing

presensiya, karon, tim-os nga gasa, padayonon
amping sa imong kasingkasing aron motunhay
ug mohayahay...

dawata ang kasamtangang
kahimtang karon...
dawata.


Akoy
2006.10.30

Kahinangop

kon motulo ang luha ngadto sa basong kape
nga gihuptan duol sa dughan, mohumot...

kini mopukaw sa handomanan
sa kanhiay...daw pagsigop og
sinabwang kamonggay...motagbaw kanimo
ug sa imong kahinangop sa Yutang Tabonon.

may kainit sa dughan nga motuhop sa kalawasan,
mosulay paglumos sa panghupaw...
diin ko karon malipayon....ug hain na diay
kadtong karaan nga hayahay?

sa imong pag-inom pag-usab...dimdima...
ang lami sa tinimplaha’g luha ug pahiyom.


Akoy
2006.10.29

Dangoyngoy

Dilaab sa dughan
ang kalayo sa kasingkasing
gatilap sa samad sa dangoyngoy.

Akoy
2006.7.1

Alho ug Lusong

Kalipay
sa kamingaw
katagbaw
sa kahidlaw

Ang paghilam sa
saging niluyang
kahinam
sa kabanikahan.

Akoy
2006.6.20