Singot Sa Alimuot

Gisingot pag-ayo, buntag sayo

Alimuot ang kwarto, pultahan nasirado

Wa milahos sa bintana ang hangin

Kay ang pultahan  gitrangkahan.

Akoy

2011.8.18

Inom

Hangin sa gawas

Misulod sa bintana

Misunod ang kainit.

Miabot ang kaalimuot.

Hinoon bisan dili mag-aircon

Pwede moinom og bugnaw nga beer.

Pero, alas kwatro y media pa intawon karon.

Akoy

2011.8.13

Zorse o Hebra

Si Zebra imong mama

Ug si Horse imong papa

Kinsa ka Zorse o Hebra?

Akoy

2011.5.21

Talisay

 

Landong sa ubos sa imong punoan

ug bulawanon ang mga dahon

nga gihanig sa tiilan.

Akoy

2011.5.17

Simponiya Sa Kaadlawon

Sa pagmata, nadungog

Ang tugtogaok sa manok

Awit sa kalanggaman

Kasikas diha sa kahilom

Daw simponiya sa kaadlawon.

Akoy
2011.4.15

Ang Dag-om

Nganong gadalogdog sa kaudtohon

Nga galagiting man unta ang kainit sa adlaw?

Sa gawas sa pultahan gisusi ang kalangitan

Ug tuod man, didto sa unahan, dapit sa amihanan

Galagom ang dakong dag-om.

Bitoon

Sa langit mihangad

Bitoon ang gitan-aw

Kay ang kahayag sa dagitab

Di na katagbaw

Sa mga panghupaw.

Akoy

2011.2.13

Gamating Nga Iring

Mitungtong sa tiil  

Ang gamating nga iring

Misandig-sandig, mipakilid

Mipaduol lang gyod sa kainit.

Bugnaw ang semento

Wa siyay tsinelas

Wa na pod siyay inahan.

Nailo ba siya o biniyaan?

Mibutho siya sa kusina

Gisagop niya kining balaya

Gihimong unlan ang akong tiilan

Panahon sa ting-ulan.

Akoy

2011.2.5

Kabog

Ang hubog nga kabog

Misuyop og tuba sa sugong

Milupad, nabunggo, nahulog.

Akoy
2010.10.5

Hapuhap Sa Bidlisiw

Ang bidlisiw sa adlaw

Sa kahaponon (alas 5:15 )

Milagbas sa bintana nga bildo

Ug mitungtong sa akong buko-buko.

Giganahan ko sa kainit sa iyang hapuhap

Akoy

2010.6.13

Dag-om Sa Bintana

Tungab sa hurot na
Nga Orange juice
Moulan kaha ron?
Taligsik na.

Akoy
2010.4.18

Udtong Tutok

Tutok

Sa

Udtong tutok.

Akoy

2010.4.18

Yamog Sa Bulak

Kanus-a ang yamog
Sa bulak...

Mauga?

Unya
Kon ang adlaw...

Upaw na.

Akoy
2010.4.18

Hain Ka Na?

Bisan sa panumdoman, hanap

Sa dughan na lang madumdoman

Gamay. Dili ang imong panagway

Ang nabatyagan, kahidlaw na lamang.

Akoy

2010.4.16

Alibangbang

Ang Iyang Sampot

Akoy
2010.4.10

Sa Dalag Nga Bukid

Ulan init
Ulan init
Lima ka oras
Angat sa bukid

Tugnaw basa
Tugnaw basa
Dunay kape unta
Didto sa ibabaw.

Lami lami
Ang init sa kape
Bisan ang gisudlan nga baso
Plastik uyamot.

Akoy
2009.4.29

Bidlisiw

Nangutana ka kon komosta ko.
Maayo ra man.
Ania.
Ang bidlisiw sa adlaw
Milagbas sa bintana
Mitungtong sa akong mga kamot.
Akong gilingi.
Gitan-aw.

Akoy
2009.4.22

Anino

Sa akong luyo
Gapasalop ang adlaw
Anino kaatbang.

Akoy
2009.4.14

Handurawan

Salop sa adlaw
Luyo sa kalubihan
Gikamingawan.


Akoy
2009.4.14

Salop

Miduaw ang handurawan sa
Salop sa adlaw luyo sa kalubihan.
Gimingaw ko sa iyang mga bulok
Sa katagbawan sa iyang katahoman.

Akoy
2009.4.14