Ako Ikaw

Ikaw
Akoang
Ginatan-aw
Gianinaw sud
Niining kalimutaw.
Ikaw nga hinulma sa
Akong galamhan, ikaw nga
Minugna sa akong hunahuna,
Akoa. Ako ikaw...Ikaw ako. Usa,  Kitang duha, nahiusa sud sa panan-aw,  sa hunahuna, sa atong galamhan nga tinipigan. Bisan tuod ikaw nga akong matataw sud sa akong panan-aw akong mugna, akong gama lamang...ug ang imong  Gianinaw sud sa imong panan-aw imohang buhat lamang..., ikaw Ug ako nahiusa ra gihapon sa atong tagsa-tagsa nga paghimatngon.     Akoy 2012.10.24

Simponiya Sa Kaadlawon

Sa pagmata, nadungog

Ang tugtogaok sa manok

Awit sa kalanggaman

Kasikas diha sa kahilom

Daw simponiya sa kaadlawon.

Akoy
2011.4.15

Unsay Nakapahabog Sa Imong Garbo Karon?

Nahimamat ang mga tawo, usa ka hugpong

Nga tag-as og kahimatngonan, sumala nila,

Agi sa pagbasa sa usa ka mahinungdanong libro

Nga nabasahan pod nako.

Nabatyagan sulod sa lawak ang ilang kaikag
Sa paghisgot bahin sa gahom sa bag-ong
Kahimatngonan nga naangkon.
Natakdan pod ko sa ilang garbo.

Akoy
2010.4.19

Mosulod Ko

Karon,
Mosulod ko,
Molakaw
Sulod ning wanang
Sa kalibotan.
Sama lang sa hunahuna
Nga gadagan-dagan
Sulod sa iyang handurawan.


Akoy
2010.1.12

Kidlap

Balay miguho
Pagkidlap sa kahayag
Sa panimuot.

Akoy
2009.4.14

Tan-aw

Sa bintana,gadungaw siya gatan-aw
Gakatawa
Ikaw gatan-aw kaniya,pwerteng lingawa

Tan-awa imong kaugalingon nga gatan-aw
Tan-awa
Sama sa imong pagtan-aw kaniya nga gakatawa.

Akoy
2009.3.2

Nagminyo

Nag-tipon

Ang ginhawa ug hunahuna 

Ang sulti ug buhat

Nagminyo.

Akoy

2008.10.30

Haw-ang

Haw-ang nga sudlanan

Pukawa ko

Inig kita nako nimo

Pahinumdomi ko.

Akoy

2008.10.26

Pagmata

Pagmata

Samtang mobangon

Pagmata

Samtang mobarog

Pagmata

Samtang mohunahuna

Pagmata

Samtang modesisyon

Pagmata

Samtang molihok

Pagmata

Samtang mobuhat

Pagmata

Kay adlawan na.

Akoy

2008.10.26

Balak sa Kalinaw

Namingwit
Sa kahilom
Sa linaw nga lanaw
Diin tin-aw ang tubig
Ug tataw ang kiay sa mga
Isdang dagko ug gagmay
Daw gihan-ay nga garay
Sa hulagway sa balak
Nga gapauraray
Sa kalinaw
Sa kahimatngonan
Sa dughan.

Akoy
2008.10.24

Ginhawa

Ang layag duyog
Sa hinoyohoy sa hangin
Lulan sa sakayan
Sa mga balod sa dughan.



Akoy
2008.10.23

Lihok

Lihok lawas
Sunod kahimatngonan


Akoy
2008.10.11

Udtong Tutok

Luwan ning barko
Gasandig, midungaw
Sa dagat mitan-aw
Gabawog-bawog
Ang mga balod,
Lalom nga kabughaw,
Plata sa kasilaw
Ang kahayag nga mitin-aw
Sa akong panimuot
Nakakita na sa kanindot
Sa dagat, sa mga balod
Nawagtang ang
Kaguol sa dughan
Ang alimuot sa utok
Nahanaw daw bula
Natunaw sa kahayag
Sa pagtutok.

Akoy
2008.9.24

Kahilom

Dili pulong kining kahilom
Makadungog, dili kaingon
Kahayag lang, daw hangin
Bisan asa paingon
Ang kisaw, tin-aw
Sa linaw gapahimuyong
Makakita, dili isda
Mopahiyom, dili kay gigutom
Adunahan siya sa katahom.

Akoy
2008.9.24