Tinghulog Og Dahon Pa Ba Karon?

Oktubre pa ron

Ngitngit na ang langit

Basa sa ulan ang dalan

Ug tugnaw na ang kilomkilom.

Apan nagkatag sa agianan ang mga dahon

Gapadayag sila nga tinghulog pa ron

Tinghulog og dahon pa ba gyod karon?

Akoy

2012.10.16

Ang Kagahapon

Ang Kagahapon 

Gimingaw sa kanhiay nga pinuy-anan 

Usa ka handurawan na lamang ang nakaplagan 

Kay tinuod man, ang kagahapon wala nay  ulianan.

Akoy

2012.10.14

Naipit Sa Sira Sa Kahigayonan

Napaslot ang kasingkasing.
Hapdos ang dughan
Sa pait nga dugo nga mikatay
Sa kaugatan ug mihalang
Ang panghupaw
Karong taknaa.

Akoy
2010.4.21

Kaatbang

Way kaugmaon
Ambot sa kagahapon
Kaatbang, ka ron.

Akoy
2009.4.14

Na!

Ang uno mi-martsa sa
Dos
Petsa dos na!
Sa Marso.

Akoy
2009.3.2

Ayaw Tandoga

Ayaw tandoga sila
Aron mahikap mo siya
Ug siya lamang ang makaangkon
Sa imong panahon.

Akoy
2009.2.24

Tungang Gabii

Naabtan na pod ko'g gabii,

Tungang gabii.

Akoy

2008.12.17

24

24 ka oras, usa ka adlaw

12 ka bulan,usa ka tuig

Ang tuig, daw 24 ka oras.

Panaw

Mibiyahe ang kalamboan

Miabot sa tugkaran

Ang panahon gadagan

Kay gapanaw ang kalibotan.

Akoy

2008.11.22

Mubo Ang Kinabuhi

Ihapon apil ang matag tudling.

(Kay mubo ang kinabuhi)

Akoy

2008.11.22

Bihag

Pughawng mga mata
Mananap nga sukad
Karon lang nahimamat
Matahom ka man,
Apan sa pagpangayam
Wa koy ikaandam.
Kon mohata ka,
Ambot kon ako mobalos
Kon manawag ka,
Diha pa ko masayod
Kon mabihag ba
Ang ulipon na daan,
Ang bihag sa panahon.


Akoy
2008.11.12

Mihunong

Tibuok higayon
Sa atong panagkuyog
Ang panahon miduyog,
Mihunong, naniid...

Akoy
2008.10.30

Gukod

Giapas sa panahon, karon
Gigukod sa damgo, kaniadto
Ugma, ugma, unsay ugma?

Akoy
2008.10.21

Nakigdagan

sa panahon
galumba,
gaapas,
gigukod?!

Akoy
2008.10.15

Adunahan

Kaadunahan ko sa
panahon karon:
inom og tsa
ug sa gutlo pagpunit sa baso,
gidampi sa ngabil
gidimdim ang pait-pait,
ang palami-lami
sa higayon
sa matag karon.


Akoy
2008.9.22

Karon Dayon

Kutob sa atong madamgo damgohon
Kutob sa atong mabuhat buhaton

Karon, kay way laing higayon
Ang panahon walay paaboton

Akoy
2008.01.12

Bung'aw

Lawom ang kagabhion sa
dihang misangpit kanimo,
kataposang buhat usa 
misulod sa kahilom,
mipahimuyong sa 
mata sa alimpuyo, diin 
migaan ang kalawasan daw 
wanang sa kawanangan ug 
mipahiyom nga naminaw sa 
taguktok sa ulan, miduyog sa 
pangatagak sa takna ngadto sa 
bung'aw sa kaadlawon sa 
hinayhinay'ng paglatas sa tulay sa 
kinabuhi sakay sa ligid sa panahon
nga gahatod sa hinanok nga pagkatulog.

Akoy
2007.01.18

Oras: Giotro'g Garay

ang balanghai
sa baybay
midunggo

balod...

ibabaw sa
way puangod
nga panahon...

ang
lingganay
mibagting...

Akoy
2006.11.06

Tinghulog og Dahon

may dahon sa tiilan
sa pagtunob sa hagdan

“tinghulog na pod...”
mabulokon nga panahon

apan dili manamilit
kon way maniid

molarag sa hilom
kon dili sud-ongon

ang dahon...
sa yuta paingon.


Akoy
2006.10.25

ang takna way tagdon

nihit ang anihonon
kay tag-init
nagpasilong ang tanan
sa puloy-anan

naglagiting ang kainit
sa kaudtohan
alimuot
bisan sa sulod

way kalooy ang adlaw
way giila
sa iyang pagsalop
way gipaabot.

ang panahon
way ilhon
ang takna
way tagdon.


Akoy
2004.4.6