Hilak Sa Kalipay

"Mang, nganong gahilak ka?",nangutana ang bata.
"Hilak ni sa kalipay", tubag sa inahan.

Natingala ang bata, katuohon dili.
Ang iyang hunahuna, "Naa diay hilak sa kalipay?"

Akoy
2010.3.26

Langgam Sa Kaguol

Adunay langgam sa kaguol
Nga mibatog sa akong dughan.
Wa ko hisayri kon diin siya gikan.

Akoy
2010.3.18

Uyab Sa Higala

Sa Pughawng Langit, samtang gasayaw ta
Ug bisan duha ka dangaw ang atong gilay-on,

"Naa ba kay nabatyagan diha sa atong taliwala?"

"Oo", tubag nimo.

Mipadayon ta sa pakigduyog sa labyog sa tugtog
Mitagamtam sa init sa gimok niining panagkuyog

"Hinaot makakita ko og sama nimo ka gwapa
Sa Habagatang Panganod nga akong puy-an"

"Daghan lagi gwapa didto, makakita ra ka".

Taod-taod, nanghagad ka nga mopauli na,
(didto sa imong kaugalingong puloy-anan).
Ang imong kaanyag milingi, nanangpit diha
Sa pultahan nga abli na, gapaabot kanako.

Wala ko mikuyog nimo,
Uyab ka sa akong higala.

Akoy
2010.3.5