Handurawan

Salop sa adlaw
Luyo sa kalubihan
Gikamingawan.


Akoy
2009.4.14

Salop

Miduaw ang handurawan sa
Salop sa adlaw luyo sa kalubihan.
Gimingaw ko sa iyang mga bulok
Sa katagbawan sa iyang katahoman.

Akoy
2009.4.14

Itlog

Itlog

Akoy

2008.11.26

Ngitngit

Ang langit ngitngit.

Akoy
2008.10.11

Ngilngig Ka

Ngilngig ang imong pamayhon
Mikurog akong unod
Nakabuhi ang ginhawa
Nahugno.


Akoy
2008.10.11

Talinghaga Sa Humba

nangalimyon ang kahumot
pag-abli sa taklob

gihukad sa talad ang
talagsaong halad

mitungha ang anito
taliwala sa bangaw

mikalawat sa halad
misimhot sa palad

tungod sa humba
natagbaw ang takna

gibayaw sa panganod
ug di na kalimot


naningangha sa
talagsaong pagtungha

sa dili ikalimod nga
talinghaga sa simod


Akoy
2007.01.25

Dan-ag

Tultolon ko ang dalan
sa dan-ag
sa handurawan.

Akoy
2006.12.02

Hayahay

human sa paningkamot,
paghunat sa tibuok kusog
sa kasingkasing ug hunahuna,
nga dili na gani ikatulog…
human ning tanan, isalig sa Amahan
itugyan kaniya ang dili na makaya


lingkod ra god ug mao ray buhaton,
kay wa nay angay pang hunahunaon
bisan unsang mosantop sa ulo,
ibutang ubos sa sampot ug lingkoran
aron dili kagimok...

tan-awon ang hangin nga namaypay sa bintana
ug ang mga dahon nga mikiay sa iyang paglabay...

Daw sa disyerto ang milabay nga mga adlaw,
way miabot nga kasulbaran…
gasalig lang gihapon
hangtod sa tukmang higayon
ang katin-aw sa panan-aw
mobutyag sa hulagway sa kalisdanan,
sa husto ug dili mao.
Ang katahoman lamang pilion
isalibay ang dili husto.
Hayahay ang pagdawat sa katahoman.

Akoy
2006.11.12

Dugay Na

dugay nang
wa ko kalupad
dugay na...

kaniadto,
molupad ko kon masulob-on
ngadto sa kawanangan, ibabaw sa kalasangan....
sa kabukiran...lunhawng tanaman...
ngadto palayo sa kahimtang...

motugpa didto sa sekretong batoganan
nga akong gitukod sa wanang…
tanan kong dulaan,
mga kalingawan...naa didto
ug mao sad akong sakyanan pagtuyok
sa tibuok kalibotan…
kuyog sa mga kahigalaan.

dugay nang
wa ko kalupad
dugay na...


Akoy
2006.11.04

Uhaw sa Kaadlawon

Siak
sa kawayan nga dingding
Ang Dughan...

Hilak
sa bata nga dumdom
Ang Suso...

Buak
sa kahilom ang dokdok
Sa Agong...

Kiat
nga sayaw sa ngitngit
Nga Kagabhion...

Uhaw
sa yamog sa banagbanag
Sa Kaadlawon.


Akoy
2006. 6.12

Banhaw

ang baho
patayng ilaga
tiil
medyas…
nabuot…
hungaw sa otot
hunahuna lang…
ikalibang.
og nabanhaw
ang nalubong
pan-os nga
ginhawa.

Akoy
2006.4.15

Mugna sa Pulong

labad sa ulo
tuyok tuyok sa utok
palayo dire, palayo ngadto
sa dapit
sa kadagatan
ibabaw sa pangpang
ang balay sa akong damgo

didto magtan-aw sa dagat
sa pantawan gapungko
sa bangko nga ginama sa kahoy
kay kining balay ginama man sa kahoy
mugna sa damgo
buot ka bang mokuyog kanako?

sa buntag magkuyog kita sa pagpamahaw
ug sa pagsalop sa adlaw
kuyog kita sa pantawan
magtupad og lingkod sa paglantaw
magsud-ong sa kanindot ning langit
samtang gahigop sa mainit nga kape.

apan sa ubang mga takna
buot kung mag-inusara diha sa sala
o sa pantawan magbasa
buot kung masulod sa
ginadamgo nga kalipay
pangandoy nga sinulat
o minugna sa pulong.

buot ka bang mokuyog?


Akoy
2003.5.17