Bulan

Bulan, O bulan
Ang tawo mihangad kanimo

Maanyag ka
Matahom pa kay sa dalaga

Perlas ka sa lawod?
O Pusod niya?

Akoy
2009.3.12

Kanimo

Tibuok adlaw
Kanimo nagtan-aw.

Tibuok adlaw
Kanimo gihalad.

Akoy
2008.10.18

Ikaw

tipik sa kagahapon,
sa kabatan-on,
sumbanan

kabahin sa handurawan
sa kalaki,
kaibog

bitoon sa langit,
sa panig-ingnan,
inspirasyon.

Ikaw,
buhing
pangandoy.

Akoy
2008.10.17

Nasayod Ba Ka?

Nasayod ba ka
Nga gipangita tika?
Nasayod ba ka
Nga nakit-an tika?
Sa inyong paglabay
Sa imong hulagway
Apan usahay...
Sa imong pag-ayo
Sa akong kwelyo kaniadto
Imong mga kamot
Imong kahilom
Imong buhok
Imong kaanyag...
Imong...makalukmay...
Imong mga mata...ngabil...
Katahom, labi na ang imong kahiladman,
Nabati ko lang, nailhan ko lang.
...niining handoman makit-an tika.
Nasayod ba ka?

Akoy
2008.9.24

Iyang Halok

Bisbisan sa pag-alima,
sa tubig sa kahidlaw
ug bidlisiw sa adlaw
unya mobukad ang bulak
sa pasalamat...salamat...salamat...

hay, ang iyang pahiyom, tim-os!
ang iyang halok, humot!

Akoy
2006.12.05

Angay Ulian

Pagkalami gyod sa kinabuhi
nga atong napuy-an ug
nahibaw-an.

Magtulo akong laway
sa lab-as nga kinilawng
giseboyasan.

Bugnaw nga bahaw
parat ang bulad, suka sa platito
mohamis og plato.

Ang saging 'labing-labing' sa uma
Tam-is nga bunga sa yutang
gihigugma.

Basta busog lang ang kagutom.
Basta puno ang dughan sa kalinaw,
magmalipayon.

Sa tabok dagat, daghang panaad.
Apan ang damgo dili makab-ot,
kay gihikalimtan.

Ibabaw sa dagat naglupadlupad ang sayawsayaw
Ubos sa pughaw ang langit, ang duha ka bata
nagdula.

"Tamsi...Tamsi...
Asa motugpa...
Direeeeeeeeeeeeeeeee!"

Sa Yuta, Kabukiran ug Kahigalaan
Ang Kagikan, ang kinabuhi
Angay ulian.


Akoy
2006.3.3

Tahom

Matahom nga bahandi
sa imong pahiyom.

Akoy
2006.3