DISYEMBRE 2006: Garay-Binayloay Sa Kamingaw, Trangkaso,Gakos ug Panghiyuta, Sabaw sa Pasko

Alegre kaayo ang palibot

Mga sugang dagitab nga walay puangod

Bisag-asang suok nagkatawa

Daw gabiay-biay nga nakahibalo

Sa kamingaw nga naka-uga

Ning nagsalimu-ang kong galamhan

Mga pundok nga nagsinuk-liay sa ilang hudyaka

Mga kalingawan nga nagahatag talagsaong pahiyom ug palakpak

Pagkaon ug ilimnon nga walay paghubas

Mga babaye nga pagka-himsog kaayong sod-ungon

Apan bisan gani ang himaya sa balay-alampuanan

Dili makawagtang sa kamingaw

Nga pagkalawom ang dili masabtang dulot

Ngadto sa kina-uyokan sa akong kabukogan.

Pedro 12.1.06
----




Ang Trangkaso
(bow)

Ang trangkaso
pagkapait kung maimo
sip-on, ubo
ug sakit sa ulo

Ang panan-aw halap-halap
ang tutunlan karat-karat
ang pamati murag gilamat
diay kay taas ang hilanat

sa mananambal di muadto
kay matulog lang sa kwarto
apan unsaon pagkaayo
kung ang ulo mura'g gakalayo

pagmata, naghuna-huna
unsa na ma'ng orasa
prutas ug bitamina
murag wala ma'y obra.

pastilan ning trangkaso
makalibog gyud sa ulo
pangandoy nga himsog ko
aron mabalik ang "normal" nga ako
(normal kaha)


Baleleng
11.28.06

----
Pahilot Day Baleleng


Ako bitaw gitabangan kog hilot sa mga gagmayng kamot sa
akong mga anak. Tuslok diri, pislit didto, hapuhap gamay, tungtongan
sa luyo, gakusgakos ginagmay, pakapin gagmayng halok.
Nag-iyahay silag angkon sa tiil, lawas, bukubuko, ulo, angtang,
kamot. Naglumba silag duotduot nya gipakapinan ug hangyo sa
Ginoo nga si nanay maayo.

Da! wagtang gud akong hilanat, bun-og sad ang lawas, hehehe!

Yani

---
Day Yani,

balak ang pagbasa nako niini.
usa ka talagsaon nga balak.

kon galing ingon ani ang atong
pagtagad sa atong Yutang Tabunon

ang hilot sa gugma ug paglaom sa iyang mga puya
maoy makapaayo gayod sa Inahang Nasod.

nindot nga sambingay, nindot nga balak sa gugma,
nindot nga pagkagaray, maayong pagkahilot.

daw gihilot sad akong kasingkasing, daw nakumot
akong dughan, kay diryot nang motulo ang akong luha.


:)Akoy
2006.12.2

---
Bay Akoy,

Salamat!

Igo lang ko nga nisuwat sa akong kalipay
nga gibati nga ang akong upat ka anghel nga gagmay
pag mga kamot nipabati sa ilang labihan nga gugmang
ginagmay sab pinaagi sa ilang paghilot ug pag-ampo.

Bulahan gyod ko Bay sa akong mga anak sama nga bulahan
ang atong yutang natawhan kon kita may gugma Kaniya.

Yani

------



Hugot Nga Gakos*

mohiusa ko sa kanhiay
nga pagbati sa pakig-uban
nga gilaksi sa hangin,
sa dagat gianod
ug gidagit sa bangis
nga panahon.


hugot nga gakos
ania na ako, nahiuli
uban kaninyo.

Akoy
2006.12.14

(Alang sa Paghiuli ni Day Jake)

------

Bonbon


Bag-ong kinaras nga dahuran lamang ang ilang naabtan

Wa maagwanta ang kusog nga unos sa pagbati

Daw hanlulukay ang duruha ka managhigugmaay nagbalikos

Pulbos nga nangalimyon nanapot sa bukobuko ug panakyuran

Bonbon diay sa yutanayng tabunon


Pedro

------


Kining kayat sa yuta mahimo ba sab ning tawgon og pakighiyuta?

Tito

------


Guwapo kaayo ang nadagmay nimo nga pulong.

Pakighiyuta!
Oh, Pakighiyuta. Balaknon sad baya, dah.

Milubog si Alog sa yuta ug ang yuta midawat sa iyang lawas ingong hinalangpon nga hinigugma. Mitulo iyang singot ug nanurok ang binhi sa balili nga bunga sa iyang pakighiyuta sa dapit.

Maayo, Bay. Guwapo kaayo.

Tomas


--

Milabong ang balili ug nabulahan ang nagpasilong
sa iyang gahom...

didto siya gapungko ug gasandig sa kahingawa,samtang gahangad sa langit ug naniid sa bulok sa
hamis nga aping sa panganod nga nalukmay sa tutok sa mainitong kahidlaw...

Akoy
---



Labad Human Hudyaka


OooohhhuuuwwaaaaAAA!!!!OooohhhuuuwwaaaaAAA!!!!
Di na gyud ko mousabbbb!!!!

Daan pa lagi ko! Giingnan nag tama na! Hala gyus
la-la! Merisi!!!

Pagsabaw og manok bisaya nga kinamunggayan Day. Palihug.
PleaseeeoooohhhuuuwwwaaaAAAA!!!!!


Kibawo bya ka nga way manok bisayag kamunggay diri.
Tagaan ta na kas tanan nimong gipangayo, init tubig, bugnaw tubig,
kape, tsa, ice cream, juice, di man gyud na ma wa.
Da lagi katilaw ka na sab og labad!!!!


Di na gyud ko mousab Nanayyyyy...
Murtalsin pa di nagyuddddoooooaaaAAAAAAAAhhhhh!!!!!

Pag tingog sa telepono si kumpare nangagda na sab.....
Og si Inday andam nas bunal......


Pedro


------------

PASKO 2006: Garay-Binayloay: Pastores

Pastores

Maayong Pasko, Maayong Pasko
Bulahang Bag-ong Tuig sa tanan, hmmmn...

Tulo ka tawo, usa ka babaye saysentahon
Duha ka lalaki maong pangidaron
Simag mga mata kay maoy ilang kaliwat
Apan di diay tulo ka adlaw nang way saktong kaon

Maayong Pasko, Maayong Pasko
Bulahang Bag-ong Tuig sa tanan, hmmmn...

Si undo lima ka tuig na
Nagpakutawg gatas sa iyang papa
Way gatas bisag kape na lang wa diha
Kamay ra, 'tam-isa sab gatas pa'

Maayong Pasko, Maayong Pasko
Bulahang Bag-ong Tuig sa tanan, hmmmn...

Si Inday gusto gyung moeskwela
Apan matrikula pirting mahala
Way mahimo si mama
Si Inday gabii nanginabuhi pug iya

Maayong Pasko, Maayong Pasko
Bulahang Bag-ong Tuig sa tanan, hmmmn...

Si tatay di makasugakod kang nanay
Silhig ang mutagbo sa ganghaan kanunay
Tungod kay gamay rang tekhom
Nisamot pa gyud kay sige lag inom

Maayong Pasko, Maayong Pasko
Bulahang Bag-ong Tuig sa tanan, hmmmn...

Waaa....hmmmn....Waaa....hmmmn.
Maayong Pasko, Maayong Pasko
Bulahang Bag-ong Tuig sa tanan, waaa....hmmmn...

Pedro

---


Unang Bitoon sa Pasko

Taliwa sa
Ngitngit nga kagabhion
Mitungha ang unang bitoon
Miabot sa pultahan ang amahan,

Bisag hubog
Ang tuong kamot gabitbit og pansit...
Init nga pansit.
Malipayong Pasko, anak!

Akoy
2006.12.18

---

Pagsubay

Samtang di pa kasubang ang kabugason, pukawon nato ang
Tanang walhong mananabtan sa Sento Otso.
Uban nila, panangtangan nato sa gapos ang
mga irong buang sa ilang pag-uwang unyang alas dose.
Ug pasagdi ang mga Insek nga manghimalad
unsang mananapa ang mipatakdol sa ilang taghoy.
Pabiyai una ang mga sugilanon ug yamyam
sa komedyanteng kosinero samtang wala pa
masunog ang kilay ni Shaay nga nagtayhop
sa anino sa gabii abay sa buak, kuaw niyang lantaka.
Samtang wa pa makapanug-ab
ang karbonatong tungol sa sunod
ting-ihaw og kuwaknit, ipalilong sa punerarya
ang tanang ngiyaw sa ambulansiya sa Bicol ug St. Bernard.
Samtang wa pa mahipos ang tanang ilhanan sa kagios,
sininaan nato ang tanang manikin sa Kamagayan
kay gipanghayblad na ang tanang lamok sa katunggan.
Samtang wa pay uha ang nahimugso nga dramaturgo,
ipa-FedEx sa tanang tubaan sa Lorega
ang kinadak-ang buaya sa Manila.
aron kalingawag sawsaw sa halang nga suka
ang tambok nilang empilya ug baga.
Sa di pa nato tungabon ang sanglitanan
sa sunod nga banagbanag,
panahon karong subayon nato kon diing lawra
manago ang tubig sa miaging tingpanggapnod sa hunasan.

Oo, samtang wala pa—

Tomas Sumakwel

----

Noy Takyo ug Nang Iska

Si Noy Takyo ug Nang Iska ahaa aaaa
Taga bukid didtos amoa
Taga bukid didtos amoa

Kada adlaw sigig pangguna ahaa aaaa
Nangiyawat nga makakwarta
Nangiyawat nga makakwarta

Tungod kang Undo ug kang Inday yaayaaay yaayaaay
Tuas siyudad kay nangiskwela
Tuas siyudad kay nangiskwela

Init sa adlaw ug ulan wa baliha ahaa aaa
Kay mag Engineer ug Nurse kuno sila
Kay mag Engineer ug Nurse kuno sila

Di manguli karong paskuha ahaa aaaa
Kay ang usa mag research pa kuno siya
Ug ang usa mag review pa daw siya

Sige lang Inday ug Undo ohhooo ooooo
Agwantahon lang namo ang kamingaw
Maagwanta man namo ang kamingaw

Og sige lang tawog basok ang duha haaa aaaa
Kay lagi magpadala gyug kwarta
Kinahanglan baya og kwarta

Apan asa man gyud ang duha ahaaa aaaa
Si Inday tuas Davao nagsayaw-sayaw
Ug si Undyo sigeg yupyop uban sa barkada

Sigeg hangad lang tawon sa adlaw wawwaww wawaaww
Si Noy Takyo ug Nang Iska tunga sa daruhan
Kay ang pag antus dunay kapuslanan
Ang pag antus dunay kapuslanan


Pedro

Disyembre 2006: Garay-Binayloay Sa Kahilom

*Kahilom*

Sa kahilom
Nabati ang kamingaw

Nanglugmaw ang luha
Gipasagdan nga nangatagak

Hapdos ang dughan

Nangandoy nga sa Yutang natawhan
makapauli...

Yani
---

Didto ko sa miaging bulan

alimango,bulad, kinilaw, ginamos, pansat

patatim,sisig,kamunggay,pansit

karon ania mibalik

salmon, trout,codfish

ham, pork hocks, spinach, pasta

oke lang basta may bugas.

Tito

---

Bay Tito,

Tinuod sab!

Nindot nga paluag sa gibati ang imong
tubag Bay.

Makangisi man sad ko ani bisan
nangatagak ang luha.

Maayo kay bag-o pa diay ka nakapauli.
Hain man ka rong dapita sa kalibutan Bay?

Yani
---



*Abi*

Abi nako'g
ako ray gimingaw

abi kog ako
ray gitugnaw

nganong
dili man ko kalupad?

Akoy
2006.12.01
---


*Mga Bituon*

Tugnaw ang kagabhion
hilom ang palibot

Ablihan ko ang bintana
hangdon ang langit

Pangitaon ang mga bituon
Imadyinon

Si tatay, si nanay, si manoy, si manang
tua ra ang kinamanghuran
naglingkod sa hagdan

Ibadlis ko sa kalangitan
dalan nga kanunayng gibaktasan
balay nga kanhi gipuy-an

Paminawon kong mga
agik-ik, katawang dala sa gitikgitk
Sud-ungon ang ilang mga pahiyom

Aron kamingaw bawnon sa kahilom.

Yani


*Dan-ag*

Tultolon ko ang dalan
sa dan-ag
sa handurawan.

Akoy
2006.12.02

---
*Paglantong sa Kahilom*
kang inse milang, silingan nga biyuda sa bana ug kalipay

Wala nimo kahigti ang nangatagak nga bunga
Sa salimpukot
Kadtong giitos mo sa gabiing matugnaw ang luy-a
Nga giinom mo uban sa bahaw nga luha
Sa makapanlimbawot mong kahilom
Walay tampi ni dunggoanan
Ang imong pagpaabot sa
Pantaw. Ayaw na lag paminawa
Ang uwang sa mga iro sa halayo
Pasagdi ang kabuntagon nga manultol
Sa saag niyang agianan
Pasagdi, Inse, ang banagbanag
Manghilam-os sa iyang yamog
Ang imong kahilom miwataswatas
Sa halayong panganod
Wa ka mag-inusara kay naa
Man sa imong liog ang kalasag
Sa kahadlok. Ayaw guniti ang tabuntabon
Sa kadlawon
Kay kini ang magpasihag sa
Pagtaob sa imong kahilom.

Tomas Sumakwel (natagik, Marso 13, 1998)

---

Tapakan*
*ang buslot sa dughan
Bisbisan, alimahon sa gugma
hayan ang luha
mauga.


Yani


---
*Kahilom*

Kaayo ra unta isulat sa kamingaw sa langit apan gidrowingan kini og
ginamos sa mga dag-om.

Tito

---

Niay ginamos o!
luyo diay sa mga dag-om,
ang bulan gapahiyom
sa balak nga naglibot sa tingkarol...
tupad sa baso...nga giimnan og tuba.

:)

Akoy
2006.12.6


*Ginamos ug ang Kinabuhing Daplig-Dagat*
Ni Che Fiel
Bulanon.
Wa tay mahimo.
Si Nanay nanangpit
Igawas ang garapon
Kay panahon na nga makuhaan
Ang mga bolinaw
Nga usa ka bulan ng giasinan.
Way kuha,
Matud pa ni Tatay
Kay ang mga isda ga iyahay
Sa lapa lapa sa lawud gataguanay.
Nangaon mi tanan
Sa ilalom sa bulan
Pagkahuman nanggawas ang mga silingan -
Ang mga inahan,
Gatapok-tapok sa may pantawan.
Ang mga amahan,
Gatinagayay ug tuba sa may lapyahan
Samtang ang mga bata,
Gapatintero sa basa.

Ug si Nung Tusoy gasugod nag balak
Dinuyugan sa gitara ni Undo nga iyang anak
Samtang ang bulan
Galili sa mga manag-uyab
Nga naggitik-gitik ug gaginukuray
Sa ilalom sa baga nga mga dahon sa Talisay.
Kay ugma kinahanglan na sad maghubang
Para ang pukot unya maandam
Kay sa Kadlawon nga musunod
Ihatud na sad sa mga inahan
Ang tingkarol
Samtang palawig ang mga amahan
Sa mga lawud nga wa pa naadtuan.
Ingon ini akong mahinumduman
Sa dapit nga among giput-an
Lami,
Bisan ginamos among sud-an.

---
*Kahilom*

Pinugngan nga pagbati

nag-uros uros

sa hinigugma di makatutok

way igong kaikag

O tinipigang gugmang ginamos.


Pedro

---

*Ginamos*

Mubiyahig 45 minutos
latas sa pikas tampi sa siyudad...
hapit sa tindahan...
mupalit
$2.76 ang matag 375 ka gramos
humot ginama sa Malabon

Isud-an sa bahaw
una' tusloan sa isda
paris sa sinugbang baboy
kauban sa utan bisaya

Balikbalikan gyod sa matag buwan
kadtong tindahan
nga namaligyag
lamian
nga ginamos.

Yani

---

*Kahilom*

Taklob sa kagabhihoon.
habol sa kabuntagon

Nganong di mobuklad
ang akong galamhan?


Akoy
2006.12.07

---
*Kahilom*

Sa kahilom motiyabaw hinuon ang kagahapon nga wala sumpayi karon. ambot. walay makatagna kon magkita pa ba ugma.

Tito


---
*Kahilom*

mahait nga hinagiban

labaw ang dulot kaysa punyal

nga ihansak sa dughan

Pedro


----
*Kahilom*

Moukab sa dughan
Ang kahilom,

tubod sa luha.

Akoy
2006.12.08
---

PASKO 2005 Garay Binayloay ni Tomas ug Akoy

Bay Tomas,

Gihan-ay nako ang binayloay nato
sa Pasko 2005, akong gihipos isip
handomanan. Salamat sa pakigduyog.

Akoy
------------

Bay Akoy,
Nindot basahon. Makaadunahan sa atong kalag ang ingon nga komunikasyon sa atong mga pagbati. Maayo kang mobalak. Usa ikaw ka wala-matawong magbabalak Bisaya.

Nasuya ko nimo, Bay. Naibog ko nimo. Ang imong arte dili kakawangan (vanity) kay alang lamang sa paglingaw sa kaugalingon. Kana maoy tinuod nga kahulogan sa arte. Basin moabot ang adlaw nga himoon tikang Bathala sa arte: yano, nagtago lang sa bungtod, ug nag-inusara sa pagyamyam sa mahika sa balak.

May leksiyon kang gihatag nako: Ang arte dili pagpaburot sa kaugalingon. Magkuyog ra unya ta inigkahuman ning buluhaton sa unahan.

Mabuhi ang magbabalak sa punoan sa dakit! Ikaw kana, Bay Akoy.

Tomas
------------

Kon Gutom si Dodong ug Inday


Unsay bili ning kinabuhi?
Kinsay halaran?

Unsay palad sa Nasod,
Kon walay paningkamot?

Dili igo ang kahibalo,
Kawang ang kaamgohan.

Way bili ang pulong,
Bisan ang pangalan.

Kon gutom gihapon
ang tiyan ni Dodong ug Inday.

Akoy
2005.12.3

---------------

Tambal Sa Kagutom

Sayon ra.
Maghunahuna ka lag
Lami nga pamahaw
Kaniadto sa imong nanay
Lanot nga lugaw nga pinitkag
Uska ka pignit nga asin
O di ba handurawa kadtong
Uska higayon
Gisung-ay ka sa imong
Tatay samtang naglihi sa
Kamoteng kinampay

Kon wa ka kasuway ini
Pangilog og tabanog sa bata
Ug kantahig lirikong eslogan
Sa Mendiola. O di ba
Hulami ang uling sa mga batang bulingit
Sa Colon nga namadlis sa ilang sugilanon
Diha sa paril sa di matulog nga dakbayan

Kon di gani, mag-itos kag bulak
Sa sampaguita sa dakong ganghaan
Sa Malacañang

Tomas Suwakwel
------------------------

Wa Gyod Tuyo-a

Mao lagi.
Apan gakutoy ang iyang tiyan
way kan-on, way sud-an.
Gihanduraw ang niluto sa iyang Inahan
sama kahumot sa 'rugby' nga gisimhot,
igo lang molimod sa tiyan nga hapdos.

Ang pasko,
kon hunahunaon
bugnaw nga kagabhion,
ilalom sa langit nga may bituon.
Apan ang bata sa usa ka daplin,
nagtikongkong ibabaw sa bugnaw
nga semento, gitugnaw….
Gidaman,
tungod sa pasmo.

Ang iyang kalag daw iro,
naglatagaw sa kadalanan, way tag-iya;
nanungkab sa kabalayan ,morag iring.
Taklobi pag-ayo ang kaldero,
kay basig makasulod.
Unyag matakloban
ang iyang damgo sulod sa kaldero!

Porya buyag!
Wa gyod tuyo-a.


Akoy
2005.12.5
---------------

Binag-ong Oda Sa Colon

Unsay kahulogan sa Pasko
Kon si Jesus natulog lang sa aseras?
Maayo na lang may rugby nga makalimod
Sa kagutom.
Ang tinuod mas labing gutom ang tawo
Sa itaas sa dakbalay
Ang tinuod nga makililimos
Mao ang adunahan nga nag-withdraw
Sa Metrobank.
Kining tanan lainlain og timbang
Sa panan-aw sa babayeng nagdalag Timbangan
Ay, gipugngan ang kaluoy kay gipatigbabaw ang
Hustisya.

Ang Colon nagpas-an sa tabon sa kalderong way sulod
Lainlain ang kartiyo sa mga damador sa Plaza Independencia
Ang limbong paglipat lang sa atong mga mata
Aron ikaantog ang duhay nawong nga sensilyo
Patay o hari ba, ang Timbangan ang maghukom

Ayaw tangtanga ang gipikit sa Iyang mga mata
Kay basin matunaw Siya sa kamatuoran
Nga gipaak sa kalimutaw sa bag-ong Jesus sa Colon

Hangad sa timailhan sa gilubngan sa atong pusod.
Ug hilom
Na usab
Siya
Karon...

Tomas Sumakwel
----------------------

Kon Dili Makaon

Tangtanga
ang taptap sa mata
sa babayeng tigtimbang og hustisya.
Bisang mohilak pa siya,
matunaw iyang kasingkasing,
sa pagtan-aw sa bata nga natulog sa aseras...
kawang gihapon kining tanan.

Kay ang luha sa kalooy, limos nga barato.
Mahal ang hustisya sa abogasya, di mapalit og sensilyo.
Bisan ang gugma, gisimba, gibalak kun giharana,
way lami gihapon!
Unsay lami sa gugma kon dili makaon?

Akoy
2005.12.6
----------------

Mansa sa Sedang Trahe Sa Babaye

Puti iyang Biste
Apan ganiha, nakita ko ang
Buling sa Sidsiran
Pagkuot sa tawo
Sa tambok niyang pitaka
Naukab ang baba sa gutom nga ilaga
Nga wa kadalitig pamahaw ni San Francis Sa Asisi
Pagkagisi sa akong kasingkasing
Nabati ko pa ang paghagtik sa rehas
Sa Manila City Jail
Gisayaw-sayawan ang akong panan-aw
Sa hapos sa truncheon
Di luha ang migawas sa mata sa Babaye
Di mahiwa ang iyang kasingkasing
Kay gialihan sa libo ka libong
Espada nga diha sa iyang kamot.

Gitimbang ko na siya
Pero kuwang og usa ka gramo

Tomas Sumakwel
------------------------

Gakos sa Inahan

Ang bata hilom, ang mata may luha.
Nagahandom sa babaye nga maamumahon.
Piniriso sa tam-is nga handomanan sa gugma.

Gitugnaw, kay Pasko, ug walay kagaksan,
Nahiwa ang galamhan sa hait
nga kaguol ug kapait.

Nawad-an og umoy, gawas sa
paghanduraw na lamang sa kagahapon...
Giduaw ang iyaan nga nag-amoma kaniya.

Sa kabanikahan,
Nagdula og pitikan.
Nitabok og sapa, nilahos sa kakahoyan.

Didto sa plasa, nakigdula, patas-anayg lupad og tabanog.
Karon gitan-aw ang langit.
Wala nay tabanog, panganod na lang.

Gianod sa panahon ang kabatan-on,
Gilumos sa kasubo ang mga handomanan,
Igo natanggong sa habog nga pangandoy.

Kanus-a motugpa sa yuta?
Sa langit daghan makita.
Apan, ang tukmod sa kamingaw, ang mogakos sa yuta.

Ang bata hilom, ang mata may luha.
Ang iyang hunahuna nilupad sa panganod, nangandoy...
Motugpa sa dughan sa babaye nga iyang Inahan.

Akoy
2005.12.7
---------------

Mga Gasa Kang Inday Mora Sa Pasko

Kanyon
Arlamayt
Kaisog
Tagoanan
Patayng lawas sa iyang hinigugma
Patayng lawas sa iyang anak
Patayng lawas sa iyang damgo
Patayng lawas sa usa ka saad sa kalinaw
Tagoanan
Kaisog
Arlamayt
Kanyon

(kuyogan ta siya sa pagdagan-dagan sa pabuto sa iyang Pasko.
Pusila! Pusila! Ang nagkamang nga kangitngit kay kana ray
nagdala og dagaw. Pusila! Pusila! ang tulo ka hari sa bag-ong panahon
Ayaw binlig kinabuhi ang tulo ka hari kay dili gasa ang ilang dala
kondili hilo alang sa anak ni Inday Mora. Ayaw ibutang sa pasungan
ang Jesus ni Inday Mora kay madutlan kana sa bala. Paril igsoon...
paril nga gama sa nagsinamali nga luha. Pusila! Pusila! Ang kometa
nga dala sa kabag-ohan. Pasagdi nga maglaylay si Inday Mora sa laylay
sa kagawasan kon naa pa man)

Kudsi ang agtang--
Sa ngalan sa Amahan
Sa Anak ug sa Inahan sa uniberso.

Tomas
----------------

Ang Gasa: Gutom Kun Bala!!!


Way taming ang kalinaw,
gamay ray ligas, bratatatatatttttttt
Gibugaw ang mga lumad
sa Yutang Kabilin,
Mga isda gihaw-as sa lanaw,
Wa nay lasang, ang agila wa nay batogan
Bungkag lampinig, ang mga putyokan
gikawatan og dugos nga binudlayan
Kamingaw sa payag, way Nanay,way Tatay
Sa adlaw nga natawhan, ang bata gibudhian
Bratatatatatttttttt, ania na ang Pasko
Iring nitakingking, makalilisang
ang gasa: gutom kun bala!!!


Akoy
2005.12.8
---------------

Tingga

Kon di madalag kalumo sa pulong
Magkuha tag tingga
Itoson, pabukalan
Ug uska basong kaisog
Ipison sa tasa sa kapungot
Ug mentras init pa
Atong isaliyab sa EDSA
Tambal sa kalintura
Ang initos nga tingga
Makahumpay sa haw-ang
Nga tiyan.

Kon di matambalan
Atong isulat sa paril
Sa Mendiola
Uban sa libo ka libong
Tunob. Ikaw ug ako
Magwara-wara sa gisi-gising
Bansilag.

Dalion ta kay basig mabugnaw
Ang initos nga tingga
Nindot ibahog sa atong
Awit sa kagawasan
Nga gilaylay sa bukid sa Ban-aw.

"Anak, ayaw ako talikdi. Ayaw himoang
lubnganan sa mga luha ang akong dughan.
Balik kanako. Balik sa inahan mong naghilak"


Tomas
--------------


Ang Negosyo Sa Tingga

Pagbakho.
Haling sa dilaab sa gyera,
silaob sa bangis ug mangtas,
sa tribo batok tribo,
nasod batok nasod,
hugpong batok hugpong,
ang tingga: Dakong Negosyo!
Sa paghaling sa kasilag ug kahadlok,
dakog halin ang tig-baligya.


Pasko na!
Gidungog sa langit ug yuta,
ang iyang pagpakatawo.
Ang langit mihalok sa yuta.
Miulan ang kalinaw ug hustisya.
Ang tingga natunaw sa iyang luha.
Sa basakan sa kinabuhi,
giibot ang kasilag ug kahadlok,
gitisok ang kalig-on ug paglaom.


Pagsaulog!
Ang budyong milanog.
Alang sa tanan ang kabalaan.
Gitugyan ang gahom ngadto sa
sa labing mapaubsanon ug malinawon.
Adlaw sa hudyaka ug kasadya,
ang kalinaw: Abundang Ani!
Sa pagtimbayayong sa anihonon,
nahapay ang negosyo sa tingga.


Akoy
2005.12.10
----------------


Lingganay

Kon hatagan kog higayon nga mausab
Gusto ko mahimong lingganay
Magsabwag kog kalinaw
Sa mga bata ilawom sa underpass sa Quiapo
Mahimo sab nga lingganay sa sorbetero
Sa gamay, tagming niining tunog
Makapukaw sa akong kabatan-on
Kadtong hatagan kog 10 sentabos
Ni Lola Perping para palit og sorbete
Mahimo sab nga lingganay lang sa tiyan
Nga mangitag bahaw kada tingpaniudto
Di mabati sa harag nga taknaang-tore
Sa Manila City Hall

Gusto kong mahimong lingganay
Nga gama sa tinunaw nga kahimatngon
Aron ang misa ni Padre Agustin
Di na kamangan sa mga bitin
Sa Sanhedrin.

Gusto ko, gusto ko, gusto ko
Nga mahimong
Ding! Dong! Ding!


Tomas
----------------

Duyan Nga Pahulayan

Panuhot maoy gidangatan
sa ngulngol nga bukog ug unod,
dagmal sa dili ingon nato.

Way mahimo,
kon gisudlan sa tugnawng hangin.
Kon mopiyong, ngutngot ang mata.
Kon mohigda, ngulngol, likod ug abaga.
Kon mokaon, mosuka.
Arang magtungko na lang kun
maglakaw-lakaw sulod sa lawak.
Way lungag kaluklokan,
palabyan sa kasakit.
Samtang, ang oras gakamang.

May pahiyom,
human sa kalbaryo,
usa ka hinanok, usa ka damgo.
Ang abyan, kaaway kun kaabay?
Gahago sa utok, gakagod sa hunahuna...
hangtod nahiuban sa kahigalaan,
sa kataw-anan nga damgo,
nahiuli hinayhinay ang kanhiay.
Sa samin sa kabuntagon, wa nay kusmod
Ang nawong, tawhay ang mata.

May pahulay sa dagat ug lapyahan,
may duyan gihikot sa duha ka punoan,
pamasko sa gidagmalan sa panahon:

duyan nga pahulayan.

Akoy
2005.12.19
-------------

Disyembre 2005: Garay-Binayloay ni Bay Tomas ug Bay Akoy