Bunabuna Kun Bagulbagol

'Bagulbagol' diay ang 'skull'?

Abi kog 'bunabuna' ang upaw sa ibabaw

Kuan kuno, ang bunabuna ubos sa tiyan

Ibabaw gamay sa kuan nga bunal-bunalan.

Akoy

2011.8.17

Ang Pagkahanaw

Kon sa handurawan mosantop
Ang pagkahanaw sa mga lumadnong pinulonagan
Daw mohalang akong galamhan
Daw katuloon akong luha.

Akoy
2008.12.26

Ang Pulong

Buhi ang pulong
Morag kagaw--
Motakod.

Akoy
2008.11.14

Diha-diha

Diha sa
tanod sa pinulongan
natagik ang hiyas sa tanaman,
naglambigit sa kahinam sa
mugnang bisaya.

Diha sa
bantawan sa Kahayag
gasidlak ang kabitoonan,
pagdasig sa kaikag ug katakos
sa mga bisdak.

Diha sa
balak ug panan-awong dagitab
mibuswak ang katahoman,
nangalimyon sa kahumot
nga kabulakan.

Diha-diha
nahigmata ang damgo
taliwa sa dayandayan
ug duyanduyan
sa lumadnong pinulongan..

Akoy
2006.7.6

Ang Kahiladman

Unsay sulod
sa kaban
nga giukban...
tan-awa...

Oh, bahandi
nga way sama,
mga Pulong
Bisaya!

Bulawanong
sugilanon
gitagik sa
pahiyom...

Mga kaalam sa
katigulangan,
gipuy-an nga
kasaysayan...

Mga bantayog
nga dili bato,
gama sa kahiladman
mugna sa mga damgo…

Maminaw ta...
mamati ta...
tahoron ang
kaliwat nga namulong:

"Hala, mga kauban
ang baba ukban
habwaon ta gikan sa kaban..."

...ang kahiladman.


Akoy
2006.2.22

ang pulong bisaya

ang matag pulong sa baba
lambigit sa yuta,
hikot sa kasaysayan.
ang matag pulong may kagikan,
buhi nga handoman,
handoman sa tingog ug dungog
sa atong katawhan.

ang matag pulong
salamin sa pagkamao,
lamdag sa pagkatawo.
ang pulong may gahom,
mamugnaon,
buntog ang gahom sa kalimot.

ang pulong bisaya, inato
kinaham sa Bisayang Dako.

Akoy
2004. 2.15

O, Mama Mia

Naglawig ko,
nag inusara
sa lawod gianod
sa hangin gitukmod.
Niabot ang kamingaw,
langob nga mitaklob,
kahilom makabungog,
ang kabugnaw...
dulot sa bukog!

O, Mama Mia
Imong tingog,
akong nadungog
sa dughan milanog,
migun-ob sa ngiob.
Dayag ang hulagway,
matahom nga pahiyom
sa kamingaw mihupay
nakigsayaw…
sa imong laylay!

O, Mama Mia
Ang imong tawag,
akong kagawasan;
handom sa kalimot,
kalipay sa nabanhaw,
naluwas nga kahidlaw.
Diay, ikaw dili isalikway,
inahan sa kanunay,
akong dungog...
Inahang Tingog!

Akoy
2003.01.19