2008/12/29

Salamat

Mainiton ang kasingkasing
Sa kainit sa kalipay
Kay siya nalipay
Ug nagmapasalamaton.

Daw gihilam sa pulong
Sa kalipay sa paghinatagay
Ang ilalom sa dughan
Sa akong kahiladman.

Akoy
2008.12.29

2008/12/26

Ang Pagkahanaw

Kon sa handurawan mosantop
Ang pagkahanaw sa mga lumadnong pinulonagan
Daw mohalang akong galamhan
Daw katuloon akong luha.

Akoy
2008.12.26

2008/12/24

Pasko Na

Kon mingaw,
Dungaw sa tamboanan.

Ang gibati
Ipahungaw sa pagtan-aw.


Akoy
2008.12.24

2008/12/19

Nangita

Nangita siya'g bahandi
Sa basurahan
Ako kaniadto, nangita
Sa kadalanan.

Akoy
2008.12.19

2008/12/18

Bituon


Pasko na
Gyod!
Ang bituon 
Masanagon.

Lawom
Ang pughawng
Kahilom
Sa langit.

Akoy
2008.12.18

2008/12/17

Tungang Gabii

Naabtan na pod ko'g gabii,
Tungang gabii.

Akoy
2008.12.17

Ang Balak

Gikan sa
Kalag sa kahiladman
Kining balak 
Dili gama sa hunahuna .

Akoy
2008.12.17

2008/12/15

Tawo

Dili tun-an ang kaugalingon
Dili na ilhon, 
Inay, ang tawo 
Magpakamao.

Akoy
2008.12.15

2008/12/12

2008/12/11

Tinghulog

Lambos, gilambos
Gilambosan ang dahon sa sanga
Aron mangahulog, matingob.

Tigsilhig siya
Ako tigdayeg uyamot
Misabot na lang bisag pungot.

Akoy
2008.12.11

Ihalad

Dal-on ang kinabuhi
Sa Kahitas-an
Ihalad
Kaniya.

Akoy
2008.12.11

Ihalad Kaniya

Dal-on nato ang kinabuhi
Ngadto sa Dios--
Ihalad Kaniya.

Akoy
2008.12.11

2008/12/08

Panudlanan

Panudlanan 
Sa lumadnong kaalam
Ang  pinulongan
Sa yuta.

Akoy
2008.12.8

2008/12/04

Na-delete!

Tinuod gyod diay ang
Counter-productive.

Akoy
2008.12.4

Kape sa Cafe

Silang duha sa Prague Cafe
Si babaye nagdala sa lalaki
Pait kuno ang iyang kape
Gipainom niya kaniya.

Akoy
2008.12.04

2008/11/27

Handoman sa Tabios

Tabyos! Tabyos!
Linagang tabyos
Kalami, kalami
Sa unang pagtilaw 
Sa init-init nga katam-is
Sa tabyos sa ubos
Sa tanaman sa kabanikahan
Gihukad sa talad-kan-anan.
Paniudto kadto sa bukid ni Lolo.

Akoy
2008.11.27

2008/11/26

Itlog

Itlog

Akoy
2008.11.26

Dialogo Sa Kinabuhi


Dialogo:

"Sa pagpahimugso kanako, 
nganong wala ko nimo pangutan-a daan?"

"Kay wa ba diay ka nakaangay ning kalibotanaha?
Karon, ikaw akong pangutan-on, sulod ka o gawas?"

"Sulod ko".

Akoy
2008.11.26

Puloy-anan

Ang lawas 
Puloy-anan
Ang mga mata
Tamboanan.

Akoy
2008.11.26

Nakadumdom Ko

Nakadumdom ko--
Ikaw nga gimingaw
Niadtong udtoha
Nag-inusara.

2008/11/22

Ako

Ako wala
Nia ako.

Akoy
2008.11.22

Unsa?

Unsay bag-o?

Akoy
2008.11.22

Pagbag-o

Mugnaon ko pag-usab
Ang akong kaugalingon

Akoy
2008.11.22

Ikaw

Ikaw
Ang akong gitara,
Akong plawta, piano, violin,
Akong tingog.

Akoy
2008.11.22

Yutapulong

Yuta
ug
Pulong

Akoy
2008.11.22

24

24 ka oras, usa ka adlaw
12 ka bulan,usa ka tuig
Ang tuig, daw 24 ka oras.

Panaw

Mibiyahe ang kalamboan
Miabot sa tugkaran
Ang panahon gadagan
Kay gapanaw ang kalibotan.

Akoy
2008.11.22

Si Lolo

Ming-una sila'g panaw
Milabay na sila ning kalibotan.

Akoy
2008.11.22

Mubo Ang Kinabuhi

Ihapon apil ang matag tudling.

(Kay mubo ang kinabuhi)


Akoy
2008.11.22


Silang Lolo

Ming-una silag panaw
Milabay na sila
Ning kalibotan

Akoy
2008.11.22

Akong Tingog

Ikaw ang akong gitara,
Akong plawta,piano, violin
Akong tingog

Akoy
2008.11.22

Ako

Ako wala,
Ania Ako.


Akoy
2008.11.22

2008/11/18

2008/11/17

Kahilom

Lubog ang hunahuna
Palundag (3x)
Tiglom (3x)
Tin-aw ang kahilom.

Akoy
2008.11.17

2008/11/14

2008/11/13

2008/11/12

Bihag

Pughawng mga mata
Mananap nga sukad
Karon lang nahimamat
Matahom ka man,
Apan sa pagpangayam
Wa koy ikaandam.
Kon mohata ka,
Ambot kon ako mobalos
Kon manawag ka,
Diha pa ko masayod
Kon mabihag ba
Ang ulipon na daan,
Ang bihag sa panahon.


Akoy
2008.11.12

May Kahilom

Dili pulong tanan
May bidlisiw ang adlaw
Ang hangin may kabugnaw
Ang kabuntagon may pahiyom.

Akoy
2008.11.12

2008/11/11

Pag-uli

Mitalikod ako,mibiya kanimo
Aron matan-aw ka sa layo
Mahinagbo sa akong pag-uli
Aron imong katahoman, matagamtaman.

Akoy
2008.11.11

2008/10/31

Palibot

Sa disyerto ba nimo itukod
Ang imong damgo?
Basurahan ba sa palibot
Ang imong gusto?

Akoy
2008.10.31

2008/10/30

Nagminyo

Nag-tipon
Ang ginhawa ug hunahuna 
Ang sulti ug buhat
Nagminyo.

Akoy
2008.10.30

Mihunong

Tibuok higayon
Sa atong panagkuyog
Ang panahon miduyog,
Mihunong, naniid...

Akoy
2008.10.30

2008/10/28

Sakayan Sa Kapit-os

Sakayan sa kapit-os ang kasingkasing
Hapdos sa mga lambos sa
Panagsangka sa kabalaka ug ginhawa

Sa ilalom nahulog ang panahon
Nalubog ang tanlag sa kahilom
Nalumos  ang pagbati, gapadailos 
Sa lapalapa, sa baroganan
Sa salog,  sa sakayan.

Miinom sa tubig, midungo, mitidlom
Ang sakayan sa kasubo ug pag-ampo
Kahuyang ug pangaliyupo midunggo.

Akoy
2008.10.28






Wala Ko

Ikaw ang tuboran sa akong kusog. (Wala ko)
Ikaw ang tuboran sa akong  kinabuhi. (Wala ko)

Akoy
2008.10.28

Unsa

Unsa gahapon?

Unsa karon?

Misulat nga way sulat-sulat.

Mitan-aw'g sine nga way sine-sine.

'Tingog lang' gahapon.

'Sakay'g balyena' karon.


Akoy

2008.10.28



2008/10/26

Haw-ang

Haw-ang nga sudlanan
Pukawa ko
Inig kita nako nimo
Pahinumdomi ko.

Akoy
2008.10.26

Pagmata

Pagmata
Samtang mobangon
Pagmata
Samtang mobarog
Pagmata
Samtang mohunahuna
Pagmata
Samtang modesisyon
Pagmata
Samtang molihok
Pagmata
Samtang mobuhat
Pagmata
Kay adlawan na.

Akoy
2008.10.26

Kaban

Ako lang ang mobayad
Sige lang, kay gikan ni gihapon sa
Maong kaban

Akoy
2008.10.26

Prinsipyo

Ang sakyanan
Paanakon og sakyanan

Ang gasto sa balay
Bayran sa kita sa balay.

Akoy
2008.10.26

2008/10/25

Tamboanan

Kanindot 
Sa tamboanan
Dayag ang langit
Yuta'g kabalayan.

Nindot gyod
Kay madungog
Ang huni sa 
Kalanggaman.

Mahanggab
Ang hayahay
Nga hoyohoy
Sa hangin.

Matan-aw
Ug mahanduraw
Siya nga mibukas
Sa bintana sa atbang.

Akoy
2008.10.25


Sayon

Tuon
Aron ang
Lisod
Mosayon.

Akoy
2008.10.25

Laktod

Gahapon
Nagkat-on
Sa paspas nga
Pagpanglaktod.

Unsa man gyod
Diay ang buhaton
Aron sa way langan
Moabot?

Akoy
2008.10.25

Kabilinggan

Badbaron ko
Ang bugkos
Nga nagbaligkos
Sa kahiladman

Tangtangon ko
Ang gapos
Nga migaid
Sa kabubut-on.

Akoy
2008.10.25

2008/10/24

Banog

Madakpan ba ang
mga pako sa banog?
Dakpon ko na lang
Ang tabanog.

Ginhawa, ginhawa...

Ah! Mihunong sa tungod!
Ang hangin ug ginhawa nahiusa!
Ang ispiritu ug kahimatngonan
Usa ra!

Ginhawa, ginhawa...


Akoy
2008.10.24

Balak sa Kalinaw

Namingwit
Sa kahilom
Sa linaw nga lanaw
Diin tin-aw ang tubig
Ug tataw ang kiay sa mga
Isdang dagko ug gagmay
Daw gihan-ay nga garay
Sa hulagway sa balak
Nga gapauraray
Sa kalinaw
Sa kahimatngonan
Sa dughan.

Akoy
2008.10.24

2008/10/23

Ginhawa

Ang layag duyog
Sa hinoyohoy sa hangin
Lulan sa sakayan
Sa mga balod sa dughan.



Akoy
2008.10.23

Ako

Ako
Ang imong tawo
Mando-i
Ako

Akoy
2008.10.23

Panihapon

lamiang pagkaon
mananoy nga laylay
mahigalaong salo-salo
malipayong tigom-tigom


Akoy
2008.10.23

2008/10/21

Gukod

Giapas sa panahon, karon
Gigukod sa damgo, kaniadto
Ugma, ugma, unsay ugma?

Akoy
2008.10.21

2008/10/20

Ilog

gilukoban sa kagabhion
ang pagkamatay ug paghimugso
sa inahan ug anak

saksi ang silingan, paryente,
bana ug ginikanan sa lawak diin
naglayog ang kangitngit ug kahayag.

Akoy
2008.10.20

Usa Lamang

Midagsa ang balod
sa nawong sa kaamgohan
Kinabuhi ko, usa lamang
Unsaon ni pag-atubang?

Akoy
2008.10.20

Batan-on

Kagahapon sa panihapon
Mitumaw sa taliwa
Sa talad-kan-anan

Mipadayag sa kaanyag
Sa kadasig ug kabulahan
Ikaw, sa imong kabatan-on.

Akoy
2008.10.20

2008/10/18

Kanimo

Tibuok adlaw
Kanimo nagtan-aw.

Tibuok adlaw
Kanimo gihalad.

Akoy
2008.10.18

Ang Balak

Gibugtaw
Sa sanag sa kahilom
Ang damgo, ang balak.

Akoy
2008.10.18

Dalan

Ang imong kabubut-on...

Akoy
2008.10.18

Higala Sa Dalan

Sa dalan
Nagkahinagbo
Nagkahimamat

Sa piniling dapit
Nagkomostahay
Nagkukabildo

"Tuod no,
gakita lang
ta sa dalan, maayo ni."

Sako
Ang usa'g usa
Sa kaugalingong kinabuhi.

Higala,
Kanus-a na pod ta
Magkita pag-usab?


Akoy
2008.10.18

2008/10/17

Bulan

Mata sa bakunawa



Akoy
2008.10.17

Ikaw

tipik sa kagahapon,
sa kabatan-on,
sumbanan

kabahin sa handurawan
sa kalaki,
kaibog

bitoon sa langit,
sa panig-ingnan,
inspirasyon.

Ikaw,
buhing
pangandoy.

Akoy
2008.10.17

2008/10/16

Samad Sa Ilad

Nangisog ang liyon
Kay gitigbas
Mibarog
Kay hapdos ang samad sa ilad,
Nakigharong,
Hangtod milampos ang katarong.



Akoy
2008.10.16

2008/10/15

Nakigdagan

sa panahon
galumba,
gaapas,
gigukod?!

Akoy
2008.10.15

Tipsing

hapit nagtipsing among aping
hapit nagkabunggo sa panagtagbo

ambot kinsa siyang bayhana
taason og buhok,husto'g pamayhon,

nahanggab ko ang
alimyon sa iyang kahumot.


Akoy
2008.10.15

2008/10/11

Ngitngit

Ang langit ngitngit.

Akoy
2008.10.11

Ngilngig Ka

Ngilngig ang imong pamayhon
Mikurog akong unod
Nakabuhi ang ginhawa
Nahugno.


Akoy
2008.10.11

Lihok

Lihok lawas
Sunod kahimatngonan


Akoy
2008.10.11

Pagpakahingpit

Sama nga hingpit
Ang imong Amahan
Sa Langit

Akoy
2008.10.11

2008/10/09

Ilhon Pag-ayo

Ilhon ko ikaw pag-ayo
Sama sa kaugalingong palad
Hapohapon...

Akoy
2008.10.9

2008/09/27

Pandongi

Ipatong imong palad
Sa akong ulo
Taboni'ng alimpulos
Pandongi og lalom nga
Katulogon, tidlom sa kahilom.

Akoy
2008.9.27

Luag Na

Tagning ang katawa
Sa tawhay nga lawas
Gikan nahuwasan sa
Ambot unsa'y nakaon.

Di na labad ang ulo
Di na sakit ang mata
Luag nang tangkugo
Luag nang ginhawa.

Akoy
2008.9.27

Ang Tanan Sumpay

Ang adlaw ug gabii sumpay
Kalipay ug kasakit sumpay
Katawa ug luha, ikaw ug ako...

Akoy
2008.9.27

2008/09/25

Ginaksanay

mihalog ang itlog
sa linagang talong,
ug migakos ang talong
sa binatil nga itlog
kay init nang mantika
sa kalaha.

Akoy
2008.9.24

Paghinumdom

Mahimut-anon ka
Imong kaisog di katarog kanako
Imong kahimuot hinoon mitanod
Sa akong buot ug pagtahod.
Kining atong panagsuoray,
Ang kahimuot sa usag-usa,
Mibugkos sa atong panagsuod,
Buhing pagbati sa panagtagbo
Ug panag-uban,tinuod way kulang.
Maoy kahinam sa pagduaw,
Sa pagbalik...sa pagsalo-salo
Sa pag-estoryahanay
Hangtod sa imong pagpanaw
Lagsik ra gihapon ko sa kahinam
Nga magkita ta gihapon.
Kay nganong dili ko katuo
Nga ikaw nawala na.
Buhi ka sa panundoman. Ikaw,
Gasandig sa haligi sa pantawan,
Gahupot sa gitara,gapaabot
Gapraktis sa atong kanta.
Gakuskos sa kahimuot
Sa sunod natong panag-abot.
Natay-og ang akong kalibotan
Sa kagabhion nga mituhop
Sa akong kahiladman ang
Kamaturan nga nakawang
Kay nganong ikaw gilabni sa kahitas-an
Gikan sa akong kiliran.
Gitay-og ko ang trono sa langit
Kay nganong ako gihikawan
Sa nag-inusarang
Kalipay ning kalibotan.

Akoy
2008.9.25

2008/09/24

Daguok

Midaguok
Ang tingog sa baka
Sulod sa akong tiyan.

Akoy
2008.9.24

Pulong

papel
lang ba ang pulong
paliron
lang sa hangin?

Kuhit Sa Awit

Nataligam-an karon
Ang mananoy nga awit
Bisan tuod ganiha ra ni gatugtog

Daw gipukaw ang kahimatngonan
Sa kanindot nga makalipay
Sa panagtagbo sa awit ug pagpamati.

Daw gipasaka sa hagdan
Giabi-abi sa pantawan
Gipadayon, gipasulod sa lawak, unya...

Gibutyagan sa katagbawan
Sa iyang tinipigan
Nga katahoman

Akoy
2008.9.24

Mibagting Ang Batingaw

Gianinaw
Ang kapunawpunawan

Diin ang dagway sa Inahan?

Ang kahilom
Sa dughan may kahalang

Way laing nabatian, way nakit-an

Mibagting...



Akoy
2008.9.24

Ang Musika

Abyan sa sayaw-sayaw

Akoy
2008.9.23

Nasayod Ba Ka?

Nasayod ba ka
Nga gipangita tika?
Nasayod ba ka
Nga nakit-an tika?
Sa inyong paglabay
Sa imong hulagway
Apan usahay...
Sa imong pag-ayo
Sa akong kwelyo kaniadto
Imong mga kamot
Imong kahilom
Imong buhok
Imong kaanyag...
Imong...makalukmay...
Imong mga mata...ngabil...
Katahom, labi na ang imong kahiladman,
Nabati ko lang, nailhan ko lang.
...niining handoman makit-an tika.
Nasayod ba ka?

Akoy
2008.9.24

Udtong Tutok

Luwan ning barko
Gasandig, midungaw
Sa dagat mitan-aw
Gabawog-bawog
Ang mga balod,
Lalom nga kabughaw,
Plata sa kasilaw
Ang kahayag nga mitin-aw
Sa akong panimuot
Nakakita na sa kanindot
Sa dagat, sa mga balod
Nawagtang ang
Kaguol sa dughan
Ang alimuot sa utok
Nahanaw daw bula
Natunaw sa kahayag
Sa pagtutok.

Akoy
2008.9.24

Kahilom

Dili pulong kining kahilom
Makadungog, dili kaingon
Kahayag lang, daw hangin
Bisan asa paingon
Ang kisaw, tin-aw
Sa linaw gapahimuyong
Makakita, dili isda
Mopahiyom, dili kay gigutom
Adunahan siya sa katahom.

Akoy
2008.9.24

Hinalay

Pula
Gibandera
Sa bintana
Gihalay

Akoy
2008.9.24

Bisita

Wala dire
Wala didto

Akoy
2008.9.23

2008/09/23

Hanggab Sa Kahumot

Kahumot!
Pag-ablis pultahan.
Adobo? (Iya)
Kutoy (Akoa)

Akoy
2008.9.23

2008/09/22

Dagway

Dili pulong
Ang motagbaw kanako.

Akoy
2008.9.22

Adunahan

Kaadunahan ko sa
panahon karon:
inom og tsa
ug sa gutlo pagpunit sa baso,
gidampi sa ngabil
gidimdim ang pait-pait,
ang palami-lami
sa higayon
sa matag karon.


Akoy
2008.9.22

Hapyod Sa Galamhan

Karon nahimatngon--
nadalahig
nakapaminaw
sa katahom sa awit
Bisan, tuod taod-taod na ning
Gatugtog sa palibot.

Akoy
2008.9.22

Ang Kinabuhi

Musika--

Unsa ang Plawta

Kon way ginhawa?


Akoy
2008.9.22

2008/09/17

Ginhawa

Papel sa dagang, napak-an,
Daw eroplano sa batang gapurol
Mituyok-tuyok sa lunhawng palibot
Sa malinawong kinabuhi sa banika.

Ning lawod sa kagabhion mihayag
Ang hunahuna luwan sa sakayan
Sa alampat namingwit og balak
Aron un-onon, sigop-sigopon.

Sa bukid ni Lolo, ubos sa balay
Agi sa kamalig, ilalom sa kalubihan,
Ang tabay misumpay sa sapa-sapa
Subay sa daplin sa uga nga basakan.

Kabaw nga gibakero mikalit og dagan
Milayat sa pilapil, migahi ang pangilong,
Ang simod mitulo, migukod sa babaye
Kabaw. Intawon, ang bata nahulog.

Ang tanang perlas sa kalibotan dili
Mapunpon kay dili tanang handomanan
Makuptan. Ginhawa lang, ginhawa...mas
Tinuod pa ang ginhawa kay sa hunahuna.

Akoy
2008.09.16

2008/09/16

DISYEMBRE 2006: Garay-Binayloay Sa Kamingaw, Trangkaso,Gakos ug Panghiyuta, Sabaw sa Pasko

Alegre kaayo ang palibot

Mga sugang dagitab nga walay puangod

Bisag-asang suok nagkatawa

Daw gabiay-biay nga nakahibalo

Sa kamingaw nga naka-uga

Ning nagsalimu-ang kong galamhan

Mga pundok nga nagsinuk-liay sa ilang hudyaka

Mga kalingawan nga nagahatag talagsaong pahiyom ug palakpak

Pagkaon ug ilimnon nga walay paghubas

Mga babaye nga pagka-himsog kaayong sod-ungon

Apan bisan gani ang himaya sa balay-alampuanan

Dili makawagtang sa kamingaw

Nga pagkalawom ang dili masabtang dulot

Ngadto sa kina-uyokan sa akong kabukogan.

Pedro 12.1.06
----




Ang Trangkaso
(bow)

Ang trangkaso
pagkapait kung maimo
sip-on, ubo
ug sakit sa ulo

Ang panan-aw halap-halap
ang tutunlan karat-karat
ang pamati murag gilamat
diay kay taas ang hilanat

sa mananambal di muadto
kay matulog lang sa kwarto
apan unsaon pagkaayo
kung ang ulo mura'g gakalayo

pagmata, naghuna-huna
unsa na ma'ng orasa
prutas ug bitamina
murag wala ma'y obra.

pastilan ning trangkaso
makalibog gyud sa ulo
pangandoy nga himsog ko
aron mabalik ang "normal" nga ako
(normal kaha)


Baleleng
11.28.06

----
Pahilot Day Baleleng


Ako bitaw gitabangan kog hilot sa mga gagmayng kamot sa
akong mga anak. Tuslok diri, pislit didto, hapuhap gamay, tungtongan
sa luyo, gakusgakos ginagmay, pakapin gagmayng halok.
Nag-iyahay silag angkon sa tiil, lawas, bukubuko, ulo, angtang,
kamot. Naglumba silag duotduot nya gipakapinan ug hangyo sa
Ginoo nga si nanay maayo.

Da! wagtang gud akong hilanat, bun-og sad ang lawas, hehehe!

Yani

---
Day Yani,

balak ang pagbasa nako niini.
usa ka talagsaon nga balak.

kon galing ingon ani ang atong
pagtagad sa atong Yutang Tabunon

ang hilot sa gugma ug paglaom sa iyang mga puya
maoy makapaayo gayod sa Inahang Nasod.

nindot nga sambingay, nindot nga balak sa gugma,
nindot nga pagkagaray, maayong pagkahilot.

daw gihilot sad akong kasingkasing, daw nakumot
akong dughan, kay diryot nang motulo ang akong luha.


:)Akoy
2006.12.2

---
Bay Akoy,

Salamat!

Igo lang ko nga nisuwat sa akong kalipay
nga gibati nga ang akong upat ka anghel nga gagmay
pag mga kamot nipabati sa ilang labihan nga gugmang
ginagmay sab pinaagi sa ilang paghilot ug pag-ampo.

Bulahan gyod ko Bay sa akong mga anak sama nga bulahan
ang atong yutang natawhan kon kita may gugma Kaniya.

Yani

------



Hugot Nga Gakos*

mohiusa ko sa kanhiay
nga pagbati sa pakig-uban
nga gilaksi sa hangin,
sa dagat gianod
ug gidagit sa bangis
nga panahon.


hugot nga gakos
ania na ako, nahiuli
uban kaninyo.

Akoy
2006.12.14

(Alang sa Paghiuli ni Day Jake)

------

Bonbon


Bag-ong kinaras nga dahuran lamang ang ilang naabtan

Wa maagwanta ang kusog nga unos sa pagbati

Daw hanlulukay ang duruha ka managhigugmaay nagbalikos

Pulbos nga nangalimyon nanapot sa bukobuko ug panakyuran

Bonbon diay sa yutanayng tabunon


Pedro

------


Kining kayat sa yuta mahimo ba sab ning tawgon og pakighiyuta?

Tito

------


Guwapo kaayo ang nadagmay nimo nga pulong.

Pakighiyuta!
Oh, Pakighiyuta. Balaknon sad baya, dah.

Milubog si Alog sa yuta ug ang yuta midawat sa iyang lawas ingong hinalangpon nga hinigugma. Mitulo iyang singot ug nanurok ang binhi sa balili nga bunga sa iyang pakighiyuta sa dapit.

Maayo, Bay. Guwapo kaayo.

Tomas


--

Milabong ang balili ug nabulahan ang nagpasilong
sa iyang gahom...

didto siya gapungko ug gasandig sa kahingawa,samtang gahangad sa langit ug naniid sa bulok sa
hamis nga aping sa panganod nga nalukmay sa tutok sa mainitong kahidlaw...

Akoy
---



Labad Human Hudyaka


OooohhhuuuwwaaaaAAA!!!!OooohhhuuuwwaaaaAAA!!!!
Di na gyud ko mousabbbb!!!!

Daan pa lagi ko! Giingnan nag tama na! Hala gyus
la-la! Merisi!!!

Pagsabaw og manok bisaya nga kinamunggayan Day. Palihug.
PleaseeeoooohhhuuuwwwaaaAAAA!!!!!


Kibawo bya ka nga way manok bisayag kamunggay diri.
Tagaan ta na kas tanan nimong gipangayo, init tubig, bugnaw tubig,
kape, tsa, ice cream, juice, di man gyud na ma wa.
Da lagi katilaw ka na sab og labad!!!!


Di na gyud ko mousab Nanayyyyy...
Murtalsin pa di nagyuddddoooooaaaAAAAAAAAhhhhh!!!!!

Pag tingog sa telepono si kumpare nangagda na sab.....
Og si Inday andam nas bunal......


Pedro


------------

Kamatuoran!

O,kahidlaw gikan pa kaniadto
Karon lang natin-aw
Daw tubig sa sapa
Pagsalom, ang kauhaw natagbaw.

Lab-as nga tubig, O kaputli!
Ang sapa way gitago.
Dayag ang bato sa ilalom
Lakip kalag ko, nabutyag.

Ang handom sa kahiladman
Mitumaw sa kahimatngonan
Sa damgo nahigmata, napukaw
Ang hagbay nga kahidlaw nahanaw.

Mahikalimtan ba?
Apan buhi ang handomanan
Sa kalag ko ug alimpatakan, diin
Ikaw ug Ako lambigit daw uhaw ug tubig.

Ikaw ug ako nahiusa sa handomanan
Diin imong katahom, akong handom
Imong pagkamao, akong nahimatud-an
Ikaw masabtan, Ako may salabotan.

Nabatyagan,nasabtan
Nahukman: "Ikaw tinuod!"
Sapa nga putli, dagayday sa Paraiso.
Ikaw tinuod, Akong mithi.

Akoy
2005.7.24

Maayong Pasko sa Tanan

Mabuhi ang Bisaya!!!

Ang Pulong nagpakatawo.

Bulahan ang tibuok kalibutan tungod sa Pulong.



Ang Pulong nga gipakatawo may gahum.



Ang pulong puluy-anan sa naglatagaw o nasalaag.

Ang pulong kagawasan ug kaluwasan sa kalag.

Ang pulong kahayag sa kangitngit.

Ang pulong himaya sa kinaiyahan, kadaugan sa kinabuhi.



Ang pulong pako sa hunahuna ug salag sa pangisip.

Kalinaw ug Kalambuan!!!



Ang pulong binisaya...

Kagawasan ug Kamamugnaon alang sa Bisaya!

Mabuhi ang Bisaya!

Matawo ang Bisaya!

Mabuhi ang Gugma sa pulong!!!


Kay ang Pulong nagpakatawo tungod sa Gugma.

Ang Pulong, Gugma.

Ang gugma, pulong nga nagpakatawo.



Gugma alang kanimo Inday ug Ondo ning Panahon sa Pasko,

Akoy
2002.12.22.

Ginhawa

Papel sa dagang, napak-an,
Daw eroplano sa batang gapurol
Mituyok-tuyok sa lunhawng palibot
Sa malinawong kinabuhi sa banika.

Ning lawod sa kagabhion mihayag
Ang hunahuna luwan sa sakayan
Sa alampat namingwit og balak
Aron un-onon, sigop-sigopon.

Sa bukid ni Lolo, ubos sa balay
Agi sa kamalig, ilalom sa kalubihan,
Ang tabay misumpay sa sapa-sapa
Subay sa daplin sa uga nga basakan.

Kabaw nga gibakero mikalit og dagan
Milayat sa pilapil, migahi ang pangilong,
Ang simod mitulo, migukod sa babaye
Kabaw. Intawon, ang bata nahulog.

Ang tanang perlas sa kalibotan dili
Mapunpon kay dili tanang handomanan
Makuptan. Ginhawa lang, ginhawa...mas
Tinuod pa ang ginhawa kay sa hunahuna.



Akoy
2008.09.16

2008/09/14

Unta

Mapunpon nako unta
Tanang handomanan pati
Na'ng mga luha, unta...

Akoy
2008.9.13

2008/09/13

Way Bisbis

Ay
Tawon
Ang mga
Kabulakan
Sa tabunong
Yuta diha
Naughan sa
Sementong
Dakbayan
Way...


Akoy
2008.9.13

2008/09/11

2008/04/28

Ang Iyang Pahiyom

Idlas
Ang anino
Sa iyang
Pahiyom

Hilas
Mahal
Pa sa
Bugas

Akoy
2008.4.28

2008/01/28

Wala Ako

Ikaw ang tuboran sa akong kusog
Wala ako
Ikaw ang tinubdan sa akong kinabuhi.
Wa ako.

Akoy
2008.10.28

2008/01/12

Karon Dayon

Kutob sa atong madamgo damgohon
Kutob sa atong mabuhat buhaton

Karon, kay way laing higayon
Ang panahon walay paaboton

Akoy
2008.01.12

SUMUSUNOD

Bisita

Bisita