Dulaan

Dulaan ang balak.
Sama sa dulaan sa bata.
Dili madakpan sa garay
ang duha ka langgam nga
nagbatog sa lain-laing
sanga nga gidayandayanan
sa lunhawng salingsing
sa lab-as nga pasundayag
sa kinaiyahan.

Akoy
2006.3.3

Angay Ulian

Pagkalami gyod sa kinabuhi
nga atong napuy-an ug
nahibaw-an.

Magtulo akong laway
sa lab-as nga kinilawng
giseboyasan.

Bugnaw nga bahaw
parat ang bulad, suka sa platito
mohamis og plato.

Ang saging 'labing-labing' sa uma
Tam-is nga bunga sa yutang
gihigugma.

Basta busog lang ang kagutom.
Basta puno ang dughan sa kalinaw,
magmalipayon.

Sa tabok dagat, daghang panaad.
Apan ang damgo dili makab-ot,
kay gihikalimtan.

Ibabaw sa dagat naglupadlupad ang sayawsayaw
Ubos sa pughaw ang langit, ang duha ka bata
nagdula.

"Tamsi...Tamsi...
Asa motugpa...
Direeeeeeeeeeeeeeeee!"

Sa Yuta, Kabukiran ug Kahigalaan
Ang Kagikan, ang kinabuhi
Angay ulian.


Akoy
2006.3.3

Ang Halok sa Lapyahan

Nagdumili nga mohalok, giuhaw
sa kahiladman nga ulianan sa tanan
nga panahom kun sugilanon. Ang balak
dili buot mabahaw ang mga kagahapon nga
usahay motumaw matag karon, makigsayaw
sa yogyog sa tambol nga nahubog sa lanog sa
kaugalingong tunob. Ug Mitungha ang kahayag
sa adlaw nga miduaw sa gialimongawang damgo
kon tinuod ba ang tanan nga mitumaw sa kahilom.

Hapdos ang dughan sa napukaw nga kamingaw sa
higala nga mipanaw sa kasadpan, nga dugay ng wa
mahimamat pag-usab, usa ka laylay sa kagahapon,
makakabig gyod sa katam-is sa paghalad sa talad-
halaran sa kahidlaw, tuboran sa mga tanghaga sa
kahiladman, nga sama sa pughawng dagat nga gi-
uhaw sa dula kun pasundayag sa parat-parat og
lami-lami nga kinabuhi. Ang halok sa aping sa

Lapyahan, kamatayon sa balod. Human og
kiay-kiay, layog-layog sa panahon, bisan
makab-ot ang gitinguha nga lapyahan,
ang damgo mahanaw ra gihapon, sa
init sa adlaw matunaw, mahiuli sa
gihapon, balik sa kahiladman,
sa walay katagbawan nga
kahidlaw, hangtod nga
mahimatngonan, diay
ang balod ug dagat,
dili duha ka binuhat,
diay Usa ra, nahiusa
sa kanunay. Ug ang
mga kiaykiay sa balod
nga nalumay sa kalipay,
nga naghandom sa halok
sa lapyahan, mosapnay sa mga
balas sa iyang kulamoy ug dughan,
mohalok sa ngabil sa baybayon, ug aron
lang diay mahibulong...tanang butang lumalabay.

Kamatayon sa balod ang halok sa
lapyahan. Ang katumanan sa damgo ug
tingusbawan, maoy iyang kataposan. Mahigmata,
hinaot pa unta, sa iyang paghiuli sa
kahiladman, sa kahimatngonan nga way
katugkaran. Diay, dili siya usa ka balod, diay Siya...

Ang Dagat, nagasapnay sa tanang
balod sa kinabuhi. Siya ang kaalam nga
nagatan-aw sa tanang kahibulongan. Siya
ang buhing kahimatngonan,
nga taliwala sa kahilom,
nagatungha, nagaduaw,
nagatan-aw sa
tanang pasundayag
sa kamatayon
ug pagkabanhaw,
nagapahiyom
sa balod nga
gadumili
paghalok sa
lapya-
han.
..
.

Akoy
2006.3.3

Tahom

Matahom nga bahandi
sa imong pahiyom.

Akoy
2006.3

Bugkos sa Kasuod

“Sa imong kamot itugyan ko ang tanan”
Nagpahiyom ka sa pag-ingon.
Daw tiaw lang.
Apan nituhop sa akong kahiladman
ang imong tingog,
imong panagway,
ug mga pulong nga gibuy-an.

Kalit kang nahanaw,
giatangan sa dalan
gikan sa bulangan pauli sa puloy-anan,
sa minahal nga asawa ug mga anak,
ug gilabni sa kangitngit ang imong kinabuhi,
gilubngan sa tingga ang imong kalawasan.

Ang puto ug bibingka nga imong bitbit,
nabulit sa kaugalingong yuta ug dugo.
Saksi ang nabilin nga tsinelas sa imong pagdagan,
pag-ikyas sa kurat nga kabangis.
Nahagba sa yuta ang imong lawas
uban sa imong suod nga higala.

Usa kaninyo ba ang naangin?
May nanimalos ba?!
Kun ilogan ka lang ba sa hinagiban?
Ug tamparos sa gidangatan, naninguha ang daotan
pagsaka sa imong balay. Ug nasak-an gyod
ang payag sa imong kauban.
Apan,wala silay nakuha.

Takulahaw sa panumdoman motumaw ka nga buhi.
Gilimod ko sa kaugalingon ang imong kamatayon.
Gibugno ko ang Dios kay gihikaw ang nag-inusarang kong kalipay.
Naglingkod ka, nagsandig sa haligi sa imong puloy-anan
samtang hapit na ko moabot sa akong pagduaw.

Ang bugkos sa atong kasuod, nahikot na sa kahiladman…
Gitugyan mo kanako ang gugma ug pagsalig.

Akoy
2006.2.28

Pahiyom

Ang kabuntagon
nagpahiyom
pagtan-aw
sa barog
sa kandilang
nakigbisog
sa kangitngit
latas sa halawom
nga kagabhion.

Akoy
2006.02.23

Nipis ang Tabil

Sa buho mibutho ang ulang,
mikamang sa abuhon nga bonbon.
Malinawon...ang lapyahan
sa hapuhap sa balod sa hamis nga balas
samtang ang adlaw mihalok sa aping
sa kapunawpunawan, nagpadailos
sa dughan sa bungtod.

Panan-awon sa kilomkilom,
ang kahayag ug kangitngit nga
nag-ilog sa babayeng gahubog tapis
daplin sa baybayon.
Paspas pas kwaknit ang hangin
nga midagit sa sapot nga nipis
ug mitabon sa buho sa ulang.

Samtang nagtimpasaw ang
matahom nga binuhat, nakighalog
sa dagat, nagbudlay ang ulang
sa parat nga kahimtang.
Sa hinayhinayng kuotkuot,
sa dakong kakugi, nakasulod ra gyod
Diay, nipis ang tabil nga kahibulongan.

Akoy
2006.2.23