Balak Ni Akoy

2009/06/21

Ang laki gapayong
Gasungkod
Bakang-bakang ang lakang
Way paki sa natagboan

Talinis

Ang gilikayan sa babaye
Ug sa usa ka lalaki
Aron dili matulisok sa payong
Sa bakang nga way paki-alam.

Akoy
2009.6.10

Bukhad nga pula
Abi ko'g alibangbang
Bulak man diay.

Akoy
2009.6.10

Hamis ang tangkugo
Ug ang iyang aping.

Gipuyos ang buhok
Itom iyang sapot

Sa atbang siya galingkod
Gabasa'g "Revolutionary Road"

Akoy
2009.6.10

Kon paantuson
Bahala'g mag-antos
Nganong magpakamatay?
Nganong di man higugmaon ang kaugalingon?

Akoy
2009.6.19

Nayabo ang tubig sa baso
Kay natabonan sa libro

Kaduha pa gyod nahitabo
Natulod, natumba, nayabo.

Akoy
2009.6.19

Naa ka sa tubig
Nia ko sa yuta
Ikaw isda
Ako tawo

Akoy
2009.6.20

Sa kinabuhi
Walay undang ang bugno
Kabantay ba ka?

Padayon lang ta
Kay ang adlaw'g gabii
Gadapayon man.

Akoy
2009.6.15