Hinagpat nga Luha

kon modaligdig ang luha ngadto sa baso sa kape...
mosamot ang iyang kahumot

kini mopukaw sa handomanan
sa kanhiay...daw pagsigop og
sinabwang kamonggay...madimdim nimo ang
lamilami ug paratparat sa kahaponon.
ang init sa sabaw motagbaw sa kahinangop
sa Yutang Tabonon…
may kainit sa dughan nga motuhop sa kalawasan,
mosulay paglumos sa panghupaw...
diin ko karon malipayon....ug hain na diay
kadtong karaan nga hayahay?

imna pag-usab ang humot nga kape...dimdima...
ang tinimplaha’g pahiyom ug hinagpat nga luha.


Akoy
2006.10.29

Pamahaw Ang Pahiyom

gatimpla'g kape...humot-humot
"daw moduaw ang balak karon...”
giandam ang dagang:

natagamtam ang kahumot
magpaabot ba kun
maglingkodlingkod lang gyod?
andam na ang ikaduhang baso,
lasaw na gamay ug tab-ang pa...
katam-is, diin gikan kining pahiyom?

ang nasiplatan nga hulagway,
hamis nga aping misapnay sa buhok
nga hapsay, kapehon nga katahoman
siya gasandig, gipatong ang mga bukton
sa gamayng paril daplin sa hagdanan...
unsay gapaluyo sa gasud-ong niya'ng mga mata?

ang kape hapit na mahurot
ang balak wa pa miabot, siya hinoon...
pamahawon ang iyang pahiyom.

Akoy
2006.10.28

Tinghulog og Dahon

may dahon sa tiilan
sa pagtunob sa hagdan

“tinghulog na pod...”
mabulokon nga panahon

apan dili manamilit
kon way maniid

molarag sa hilom
kon dili sud-ongon

ang dahon...
sa yuta paingon.


Akoy
2006.10.25

Nagpuyo Sa Tanan Ug Sa Tawo

u“Ikaw na lang ang nabilin kong kinabuhi”
Nagkanayon ang babayeng masakiton,
may ngil-ad nga sakit nga wa nay ikapanapo sa
bisang unsang misulod nga mikrobyo.


Ang madungog nga tingog gutom ug uhaw
Mihapuhap usab sa dughan ang katagbaw
dagayday sa nanam sa tubig.
Ang mihalog nga agulo sa tangkugo, gakson sa pag-inom ug pagtagamtam
sa lab-as nga kaalam nga motipak ang himbis sa kalimotaw,
motin-aw ang mata human sa paghigop sa paratparat nga sabaw.

Hain ka Bathala?
Nga bisan ikaw man ang paghandom, ikaw man ang gapangita,
Ikaw ang pangutana sa tubag, ug ang tubag sa katingala.
Nagpuyo imong gugma sa tanang linalang, nahiusa kanimo
Bathala sa tanan. Ang kauhaw ug katagbaw nagpuyo
sa dughan sa tawo.


Tingog ni Bathala milanog sa dughan,
maong lanog sa pagkahimugso sa kalikopan,
mao rang agulo sa pagtubo sa kalibotan---
agulo sa kasakit, agulo sa katagbaw---
tingog nga balaan.



Akoy
2006.8.4

Kon Diin Agion

Ang ritmo sa tambol
di na angay hunahunaon,
hinoon, bation…sination.

matag untol sa kamot
pitik sa tudlo
kun dahunog sa lanog
sayaw sa hinay ug kusog
himas kun hapak
duot kun bundak
sa kalit kun balikbalik…

Way ikasugilon, sama sa
hunghong sa kagabhion
hinoon, ang mata


mopiyong…


Duyog sa higayon,
sunod sa gimok sa palad
kuyog sa tunob sa tambol

nga mohatod
og kalipay
ngadto sa
bukana
sa kagawasan,
hangtod
sa kinatumyan…

Nga saksi ang kahiladman
ug ang kapunawpunawan,
kon diin agion

ang langit.

Akoy
2006.7.29

Takulahaw

Buhing hulagway sa banika, suod nga higala…
mikidlap sa wanang sa akong panumdoman.

Akoy
2006.07.21

Diha-diha

Diha sa
tanod sa pinulongan
natagik ang hiyas sa tanaman,
naglambigit sa kahinam sa
mugnang bisaya.

Diha sa
bantawan sa Kahayag
gasidlak ang kabitoonan,
pagdasig sa kaikag ug katakos
sa mga bisdak.

Diha sa
balak ug panan-awong dagitab
mibuswak ang katahoman,
nangalimyon sa kahumot
nga kabulakan.

Diha-diha
nahigmata ang damgo
taliwa sa dayandayan
ug duyanduyan
sa lumadnong pinulongan..

Akoy
2006.7.6